Nuus 17:00

BULLETIN 16 Mei 6 nm

Goeiemiddag. Ek is……..

In die bulletin:

# Steenhuisen prys minister Godongwana se pogings met Begroting 3.0
# AfriForum veroordeel regering dat wêrelderfenisgebiede verwaarloos word te midde van oproepe vir nog terreine
# En krieket: Die Indiese Premierliga hervat môre 

# Die DA-leier, John Steenhuisen, het die minister van Finansies, Enoch Godongwana, se pogings geprys met die hersiene nasionale begroting, bekend as Begroting 3.0. Steenhuisen het op die Nampo-oesdag in die Vrystaat die aanbieding as wonderlik beskryf en vordering met die proses verwelkom. Hy het die samewerkende benadering beklemtoon om ‘n geloofwaardige begroting op te stel wat daarop gemik is om beleggersvertroue en ekonomiese groei te bevorder. Die hersiene begroting sal na verwagting Woensdag in die Parlement ter tafel gelê word.

# Tiger Brands het die verkoop van sy Langeberg- en Ashton Foods-ingemaakte vrugte-onderneming aangekondig aan ‘n konsortium wat Wes-Kaapse vrugteprodusente insluit. Dit is daarop gemik om meer as drie-duisend werksgeleenthede te beskerm en te verseker dat die onderneming volhoubaar bly. As deel van die ooreenkoms sal die onderneming 150-miljoen-rand in ‘n gemeenskapstrust belê om die plaaslike Langeberg-gebied te ondersteun. Hulle sal ook 31-miljoen-rand bestee om die omgewing se geriewe op te gradeer. Die transaksie is steeds onderhewig aan regulatoriese goedkeuring en sal na verwagting later vanjaar afgehandel word.

# AfriForum sê die regering moet voorkeur gee aan die instandhouding van bestaande wêrelderfenisgebiede voordat nuwe plekke voorgestel word. Dit volg ná ’n oproep van die Departement van Bosbou, Visserye en die Omgewing vir voorstelle om meer gebiede op die lys te voeg. Marais de Vaal van AfriForum sê plekke soos Robbeneiland in die Wes-Kaap en Mapungubwe in Limpopo is besig om agteruit te gaan weens swak instandhouding, gebrekkige wetstoepassing, verwaarlosing en onwettige bedrywighede:

# Kaapstad se burgemeester, Geordin Hill-Lewis, sê die suidoostelike uitbreiding van die MyCiTi-busdiens is die grootste belegging deur enige metro tot nou. Meer as ses-miljard-rand is in die huidige begroting-siklus van drie jaar aan die projek toegewys. Bouwerk het reeds begin langs die Imaam Haron-weg en die Stanhope-brug op die die hoofroete-uitbreiding van Khayelitsha en Mitchells Plain. Hill-Lewis sê dis opwindend om die groot vordering op die nuwe roete te sien:

# Krieket: Die gasheer, Royal Challengers Bengaluru, en Kolkata Knight Riders pak mekaar môre wanneer die Indiese Premierliga na ‘n week hervat. RCB is tans tweede op die punteleer na Gujarat Titans, met beide spanne wat slegs een oorwinning nodig het om te kwalifiseer vir die uitspeelwedstryde. Gujarat speel môre teen Delhi Capitals. Die ander spanne wat steeds in die wedloop is, is Punjab Kings, Mumbai Indians, Delhi, KKR en Lucknow Super Giants. Sunrisers Hyderabad, Rajasthan Royals en Chennai Super Kings kan nie meer kwalifiseer nie.

# En die finansiële aanwysers: Die rand verhandel teen 18-rand-8-sent teen die dollar, 20-rand-25-sent teen die euro en 24-rand-4-sent teen die pond. Bitcoin verhandel teen 103-duisend-549-dollar. Die prys van goud is drie-duisend-177-dollar-44-sent per fynons en die prys van Brent-ruolie 64-dollar-51-sent per vat.

Bly ingeskakel vir meer nuus……………….