Nuus 17:00

BULLETIN NUUSAGENTSKAP 10 Desember 5 nm

Goeiemiddag. Ek is……..

In die bulletin:

# Die staat verloor sy aansoek om Danny Jordaan se advokaat te verwyder
# Krieket: Die Protea-vroue is gereed vir hulle geskiedkundige toets teen Engeland
# En ‘n professor aan die Universiteit van Pretoria sê verklikkers moet beloon word vir hul moed

# Die staat het sy aansoek verloor om die regsverteenwoordiger van die president van die Suid-Afrikaanse Sokkervereniging, Danny Jordaan, te laat onttrek. Aanklaers het in die Gespesialiseerde Handelsmisdaadhof in Palm Ridge, Gauteng, beweer Norman Arendse het ‘n botsing van belange weens vorige bande met SAFA en is moontlik ʼn getuie. Arendse sê hy het tans geen bande met SAFA nie. Die hof sê hy het geen jurisdiksie oor onttrekking nie en het aanbeveel die kwessie word na ʼn hoër hof verwys. Jordaan en twee medebeskuldigdes word van bedrog aangekla.

# Die Gautengse Onderwysdepartement het 207-miljoen-rand toegeken vir 453 opslaanklaskamers en 73 badkamer-eenhede om in 2025 vir 325-duisend-858 leerders plek in skole te verseker. Die begrotingstoekenning volg nadat 625 mobiele eenhede verkry is om satellietskole in brandpunt-gebiede te vestig. LUR Matome Chiloane sê die departement het ook 1,1-miljard-rand in skoolvervoer belê. Die provinsie sal volgende jaar meer as 227-duisend leerders na sowat 765 skole in die provinsie vervoer.

Die Wes-Kaapse Onderwysdepartement het intussen ‘n beroep gedoen op gemeenskappe om skole die vakansie te beskerm teen inbrake en opsetlike beskadiging. Die LUR vir Onderwys, David Maynier, het beklemtoon skole is noodsaaklike gemeenskapsbates en dus uiters belangrik vir leerders se toekoms. Hy het die polisie se waaksaamheid en samewerking gevra om ‘n veilige omgewing te verseker, en bepleit onmiddellike aanmelding van verdagte bedrywighede naby skole:

# Krieket Suid-Afrika het die groep van 15 Protea-vroue aangewys vir hulle eenmalige toets teen Engeland op die Mangaung-ovaal in Bloemfontein vanaf die 15de. Die wedstryd is die eerste tuistoets vir Suid-Afrika sedert Maart 2002. Die nelbouler Tumi Sekhukhune vervang die medium-snelbouler Ayabonga Khaka. Lara Goodall, Ayanda Hlubi en Chloé Tryon is terug in die span nadat hulle die vorige toets teen Indië misgeloop het. Hoofafrigter Mandla Mashimbyi glo dit is ‘n uitstekende geleentheid om te leer:

# Die finansiële aanwysers: Die rand verhandel teen 17-rand-88-sent teen die dollar, 18-rand-80-sent teen die euro en 22-rand-78-sent teen die pond. Bitcoin verhandel teen 97-duisend-654-dollar. Die prys van goud is twee-duisend-673-dollar-50-sent per fynons en die prys van Brent-ruolie 71-dollar-75-sent per vat.

# En ten slotte: ‘n Professor aan die Universiteit van Pretoria, Natasja Holtzhausen-Du Toit, sê verklikkers moet beloon word vir hul moed, en nie met hul lewe daarvoor betaal nie. Sy sê dit is wat gebeur het met ‘n senior finansiële beampte van die Gautengse Gesondheidsdepartement, Babita Deokaran, omdat sy nie stilgebly het toe sy bedrog ontdek het nie, en voor haar huis vermoor is. Holtzhausen-Du Toit sê verklikkers bevorder deursigtigheid en aanspreeklikheid in die privaat sowel as die openbare sektor:

Bly ingeskakel vir meer nuus……………….