Nuus 17:00

BULLETIN NUUSAGENTSKAP 9 Desember 5 nm

Goeiemiddag. Ek is……..

In die bulletin:

# Die gewese onderwyser en joernalis Willem Breytenbach word gevonnis tot vyf jaar vir seksuele aanranding
# Brandstofprobleme veroorsaak vlugvertragings op die OR Tambo-internasionale lughawe in Gauteng
# En, krieket: Slegs die Proteas, Australië en Indië is nog in die wedloop vir die eindstryd van die  Wêreldtoetskampioenskap

# Die gewese onderwyser en Media24-joernalis, Willem Breytenbach, is tot vyf jaar gevangenisstraf gevonnis vir seksuele en onsedelike aanranding. Hy het verlede week in die Kaapstadse Streekhof skuld beken op sewe aanklagte van onsedelike aanranding en drie van seksuele aanranding. Die hof het sy skulderkenning aanvaar op grond van ‘n polisieondersoek wat gevloei het uit Deon Wiggett se potgooi-uitsending, My Only Story. Breytenbach mag ook nie met kinders werk nie en sy naam word gevoeg op die registers vir nasionale kinderbeskerming en seksoortreders.

# Die OR Tambo-internasionale lughawe in Gauteng het aangekondig hy ervaar tans uitdagings met brandstof, wat vlugvertragings veroorsaak. Die Lughawensmaatskappy van Suid-Afrika het bevestig tegnici is dringend aan die werk om die probleem op te los. Passasiers word aangeraai om hul lugrederye te kontak vir die jongste inligting oor vlugkennisgewings, of om die ACSA-toepassing te gebruik. Die lughawe het om verskoning gevra vir die ongerief en versoek geduld.

# City Power in Johannesburg sê hy het ‘n omvattende verslag aan die Nasionale Energiereguleerder voorgelê waarin hy Eskom se voorgestelde tariefverhogings vir die volgende drie jaar ten sterkste teenstaan. Eskom het by Nersa aansoek gedoen vir die goedkeuring van ‘n verhoging van 36,15-persent van April volgende jaar as deel van sy veeljarige prysbepalingsaansoek. City Power het in sy voorlegging aangevoer die verhogings behoort nie meer as 11-persent te wees nie. ‘n Woordvoerder, Isaac Mangena, sê hulle het ook vir ‘n billiker benadering tot tariefaanpassings gepleit:

# Krieket: Slegs Suid-Afrika, Australië en Indië kan nog die eindstryd van die Wêreldtoetskampioenskap haal. Die Proteas het tot die boonste plek verbeter nadat hulle vandag in Gqeberha 2-nul skoonskip gemaak het in die reeks teen Sri Lanka, met Australië tweede en Indië derde. Die Protea-bouler Dane Paterson is as speler van die wedstryd aangewys en kaptein Temba Bavuma as speler van die reeks. Bavuma sê hulle besef oorwinnings in die komende twee toetse teen Pakistan sal hulle tot die eindstryd laat deurdring:

# Die finansiële aanwysers: Die rand verhandel teen 17-rand-82-sent teen die dollar, 18-rand-82-sent teen die euro en 22-rand-74-sent teen die pond. Bitcoin verhandel teen 98-duisend-701-dollar. Die prys van goud is twee-duisend-657-dollar-77-sent per fynons en die prys van Brent-ruolie 71-dollar-87-sent per vat.

# En ten slotte: Een van Suid-Afrika se mees bekroonde mode-ontwerpers, Gert-Johan Coetzee, het sy jongste versameling in samewerking met Disney bekendgestel. Die beperkte uitgawe vier geliefde Disney-karakters soos Donald Duck, Mickey Mouse, en karakters uit The Lion King en die Disney-prinsesse. Coetzee sê die ontwerpe wil elke vrou laat voel sy kan haar eie sprokiesverhaal uitleef, gevul met selfvertroue, skoonheid en krag.

Bly ingeskakel vir meer nuus……………….