Nuus 17:00

BULLETIN NUUSAGENTSKAP 29 November 5 nm

Goeiemiddag. Ek is……..

In die bulletin:

# Die Gesondheidsdepartement handel 2025 se mediese plasings af
# Ramaphosa vereer Suid-Afrika se Olimpiese en Paralimpiese medaljewenners 
# En krieket: Die Proteas stel aan Sri Lanka ‘n wenteiken van 516 in Durban

# Die Departement van Gesondheid het agt-duisend-403 mediese interns en gemeenskapsdiensbeamptes suksesvol geplaas vir volgende jaar. Die minister van Gesondheid, Aaron Motsoaledi, het aangekondig sewe-duisend-701 aansoekers het plasings aanvaar en die meeste is toegeken aan hul eerste keuses. Die departement se woordvoerder, Foster Mohale, sê kategorieë soos dokters, tandartse en aptekers is volledig geplaas, maar 73 omgewingsgesondheidsbeamptes wag nog op plasing. Hy sê die proses verseker plasings sal teen Januarie begin:

# Die Reserwebank waarsku verswakkende infrastruktuur hou ‘n wesenlike bedreiging in vir die finansiële stelsel. Terwyl vordering gemaak is met die beskikbaarheid van elektrisiteit, duur uitdagings met watervoorsiening, gehalte en vervoerinfrastruktuur voort, wat ‘n invloed het op munisipaliteite se invordering van inkomste en vermoë om skuld terug te betaal. News24 berig skuld van 23,4-miljard-rand aan waterrade vererger ook die krisis. Die bank sê ’n hernude fokus op die herstel van infrastruktuur en fiskale verbeterings sal finansiële bestendigheid en kredietgraderings beïnvloed.

# Drie beweerde onwettige mynwerkers is noodlottig gewond tydens ‘n struweling met wetstoepassers in Sabie, Mpumalanga. Beamptes is aangeval toe hulle patrollies gedoen het naby die New Village-mynskag. Die skietery het gevolg nadat ‘n polisiebeampte beseer is. Owerhede het twee AK-47-gewere en 500 rondes ammunisie op die toneel gevind. ‘n Saak van poging tot moord word ondersoek. Die waarnemende provinsiale polisiekommissaris, Zeph Mkhwanazi, moedig waaksaamheid aan teen swaargewapende onwettige mynwerkers.

# President Cyril Ramaphosa het die gesogte Skuld van Jove aan die afgetrede swemmer Tatjana Smith en die Paralimpiese atleet Mpumelelo Mhlongo oorhandig vir hul uitsonderlike vertonings op die Olimpiese en Paralimpiese Spele in Parys. Hy het die medaljewenners-seremonie by die Uniegebou in Tshwane bygewoon en die prestasies van Span SA gevier nadat die land ses medaljes op elk van die Speles verower het. Ramaphosa sê hul prestasies weerspieël hul persoonlike toewyding en Suid-Afrika se verbintenis om ‘n volhoubare sportkultuur te bou:

# Krieket: Die Proteas het Sri Lanka ‘n wenteiken van 516 gestel op die derde middag van die eerste toets in Durban toe hulle hulle tweede beurt gesluit verklaar het op 366 vir vyf. Dit volg op Suid-Afrika se eerstebeurt-voorsprong van 149 lopies nadat hulle die besoekers vir slegs 42 uitgeboul het. Kaptein Temba Bavuma het sy vegtersbeurt van 70 in die eerste beurt opgevolg met 113 in die tweede terwyl Tristan Stubbs 122 aangeteken het. Aiden Markram het sy onlangse lopiedroogte afgeskud met 47.

# En die finansiële aanwysers: Die rand verhandel teen 18-rand-6-sent teen die dollar, 19-rand-8-sent teen die euro en 22-rand-92-sent teen die pond. Bitcoin verhandel teen 96-duisend-949-dollar. Die prys van goud is twee-duisend-658-dollar-91-sent per fynons en die prys van Brent-ruolie 72-dollar-93-sent per vat.

Bly ingeskakel vir meer nuus……………….