Nuus 17:00
BULLETIN NUUSAGENTSKAP 21 November 5 nm
Goeiemiddag. Ek is……..
In die bulletin:
# Die terugkoopkoers word verlaag met 25 basispunte
# Die Internasionale Strafhof reik lasbriewe uit vir Netanyahu, Gallant en Hamas-leier Deif
# En, krieket: Jasprit Bumrah sê Virat Kohli lyk onheilspellend goed voor die eerste toets in Perth
# Die Reserwebank se Monetêre Beleidskomitee het besluit om die terugkoopkoers met 25 basispunte te verlaag tot 7,75-persent. Dit volg op gister se aankondiging dat inflasie in Oktober 2,8-persent was – laer as die bank se inflasieteiken van tussen 3- en 6-persent. Die koersverlaging beteken dat die prima-uitleenkoers tot 11,25-persent daal.
# Die Gautengse Onderwysdepartement het bevestig ‘n graad R-leerder van Dumezweni Primary in Diepkloof, Soweto, het gesterf en drie ander leerders is hospitaal toe geneem met soortgelyke simptome, nadat hulle versnaperinge geëet het. Die polisie stel ondersoek in, en ondersteuningsdienste is beskikbaar. Die departement se woordvoerder, Steve Mabona, sê LUR Matome Chiloane het medelye met die gesin betuig en wens die siek leerders ‘n spoedige herstel toe:
Die Stad Tshwane het intussen ‘n spazawinkel-registrasie-uitreikprogram in al sewe streke van die metro van stapel gestuur. President Cyril Ramaphosa het opdrag gegee dat alle spazawinkels en voedselhanteringsondernemings binne 21 dae moet registreer in ‘n poging om die dodelike uitbreking van voedseloordraagbare siektes die hoof te bied. Die burgemeesterskomiteelid vir Ekonomiese Ontwikkeling en Ruimtelike Beplanning, Sarah Mabotsa, sê alle spazawinkeleienaars en voedselhanteringsondernemings moet die geleentheid aangryp om te registreer:
# Die DA vra vir die name van hoëprofiel-afpersers moet bekend gemaak word om aanspreeklikheid en deursigtigheid te verbeter. Die party het vandag sy vyf-puntplan teen afpersing bekendgemaak. Dit is gemik op die beskerming van ondernemings, die bekamping van misdaad, en die herstel van veiligheid in gemeenskappe. Volgens die party ontduik oortreders dikwels geregtigheid weens lang regsprosesse. Die DA-lid, Dianne Kohler Barnard, sê die identifisering van oortreders sal as afskrikmiddel dien en dui op ‘n ferm standpunt teen korrupsie:
# Die Internasionale Strafhof het lasbriewe uitgereik vir die Israelse premier, Benjamin Netanyahu, die land se voormalige minister van Verdediging, Yoav Gallant, en die Hamas-leier, Mohammed Deif. Die hof beweer oorlogsmisdade en misdade teen die mensdom is gepleeg tydens die Gaza-oorlog en die aanvalle in Oktober 2023. Netanyahu het die stap vroeër as anti-Semities veroordeel, terwyl die Amerikaanse president, Joe Biden, Israel se reg tot selfverdediging steun. Die hof verwerp twee Israelse uitdagings van sy jurisdiksie en sê dis nie ‘n vereiste vir Israel om die hof se jurisdiksie te aanvaar nie.
# Krieket: Indië se waarnemende kaptein, Jasprit Bumrah, hou vol die span het geen letsels oorgehou nadat Nieu-Seeland hulle in die toetsreeks oorrompel het nie. Hy waarsku Australië hulle ster-kolwer, Virat Kohli, vertoon onheilspellend goed. Indië is gereed vir die eerste van vyf toetse teen Australië wat môre in Perth begin na hulle eerste nederlaag in ʼn toetsreeks tuis in 12 jaar. Die snelbouler sal die span aanvoer in die plek van Rohit Sharma wat tuisgebly het vir die geboorte van sy tweede kind.
# En die finansiële aanwysers: Die rand verhandel teen 18-rand-7-sent teen die dollar, 19-rand-1-sent teen die euro en 22-rand-84-sent teen die pond. Bitcoin verhandel teen 97-duisend-474-dollar. Die prys van goud is twee-duisend-665-dollar-97-sent per fynons en die prys van Brent-ruolie 73-dollar-85-sent per vat.
Bly ingeskakel vir meer nuus……………….