Nuus 17:00

BULLETIN NUUSAGENTSKAP 7 Desember 5 nm

Goeiemiddag. Ek is……..

In die bulletin:

# Die DA vra vir groter deursigtigheid oor Koeberg se lewensverlengingsprojek
# Nog twee sonkragprojekte in bodvenster 5 begin vroeg volgende jaar
# En, rugby: O’Gara die vyfde keer geskors weens swak dissipline

# Die DA het ‘n beroep op die regering, Eskom, en die Nasionale Kernreguleerder gedoen om dringende hulp van die Internasionale Atoomenergie-agentskap in te win oor die Koeberg-kernkragsentrale se lewensverlenging rakende die dreigende Julie 2024-sperdatum. Hulle doen ‘n beroep op die regering om deursigtigheid, gereelde veiligheidsoudits en deurlopende monitering voorop te stel om suksesvolle en veilige projekvoltooiing te verseker om potensiële beurtkragrisiko’s te voorkom. Die DA-lid, Kevin Mileham, dring aan op Parlementêre toesig en openbare bekendmaking van veiligheids-ouditverslae vir aanspreeklikheid in hierdie deurslaggewende energieprojek:

Intussen begin bouwerk vroeg volgende jaar aan twee 75-megawatt-sonkrag-fotovoltaïese projekte wat deel is van Suid-Afrika se vertraagde bodvenster 5-aankoopprogram vir hernubare energie. EN-GIE, in samewerking met Pele Green Energy, gaan die projekte in Grootspruit in die Vrystaat en Graspan in die Noord-Kaap bou. Die uitvoerende hoof van EN-GIE Suid-Afrika, Mohamed Hoosen, sê die projekte en 23 ander, sal na verwagting bydra tot die land se hernubare energie-onafhanklike kragprodusente-verkrygingsprogram en aan die einde van 2025 in werking gestel word.

# Die South African Health Professionals Collaboration doen ‘n beroep op president Cyril Ramaphosa om die Wetsontwerp op Nasionale Gesondheidsversekering na die Parlement terug te stuur vir heroorweging. Die organisasie noem kommer oor die wetsontwerp se gebrek aan duidelikheid en potensiële uitwerking op gesondheidsorggehalte. Gehalte, toegangsbeperkings, behandelingsprotokolle, bestuur, korrupsierisiko’s, professionele beweeglikheid, opleiding, medies-regs-litigasie en provinsiale uitwerking is bykomende bekommernisse. Hulle voer aan die wetsontwerp, veral Artikel 33, is ongrondwetlik en bedreig die privaat gesondheidsorgsektor. Die groep versoek Ramaphosa se ingryping om die NGV vir alle burgers te verbeter.

# Die DA in die Oos-Kaap sê staatskaping het nuwe hoogtes bereik in die Nelson Mandelabaai-munisipaliteit onder die burgemeester, Gary van Niekerk, en sy koalisieregering. Dit volg ná die metro se weiering om opdragte van die minister van Finansies, Enoch Godongwana, oor die Mandelabaai-ontwikkelingsagentskap in te stel. Die DA-lid, Andrew Whitfield, sê meer as drie maande het verloop sedert die besluit om die raad van die agentskap te ontbind en regstappe gedoen is om die aanstelling van sy uitvoerende hoof, Anele Qaba, tersyde te stel:

# Rugby: Die Franse span La Rochelle se direkteur van rugby, Ronan O’Gara, mag nie Sondag op die kantlyn wees gedurende die Kampioenebeker-tuiswedstryd teen Leinster nie. Hy is vir ‘n week geskors weens swak dissipline tydens verlede maand se Top 14-wedstryd teen Racing 92. Die voormalige Ierse losskakel is nou reeds vyf keer geskors sedert hy in 2021 by die span aangesluit het, vir ʼn straf van altesaam 21 weke. La Rochelle se vleuel, Teddy Thomas is intussen vir vyf weke geskors weens ʼn gevaarlike duikslag.

# Die finansiële aanwysers: Die rand verhandel teen 18-rand-74-sent teen die dollar, 20-rand-20-sent teen die euro en 23-rand-56-sent teen die pond. Bitcoin verhandel teen 43-duisend-361-dollar-49-sent. Die prys van goud is twee-duisend-en-32-dollar-46-sent per fynons en die prys van Brent ruolie 75-dollar-6-sent per vat.

Bly ingeskakel vir meer nuus……………….