Nuus 17:00

BULLETIN NUUSAGENTSKAP 5 September 5 nm

Goeiemiddag. Ek is……..

In die bulletin:

# President Ramaphosa verseker China van die regering van nasionale eenheid se verbintenis tot bilaterale betrekkinge 
# ‘n Gewapende man word doodgeskiet naby die Israelse konsulaat in München
# En 19 Wêreldbeker-wenners speel Saterdag vir die Bokke teen die All Blacks in Kaapstad

# President Cyril Ramaphosa het bevestig dat Suid-Afrika se vorming van ‘n regering van nasionale eenheid nie betrekkinge met China sal raak nie. Ramaphosa het gepraat na die afhandeling van die Forum oor Samewerking tussen China en Afrika, en klem gelê op die versterking van bande met China, wat hulle verhouding sal omskep in ‘n volronde samewerkende vennootskap. Hy het die Chinese president, Xi Jinping, verseker van die voortgesette belyning van die regering van nasionale eenheid se buitelandse beleid:

# Die kabinet loof Eskom omdat hy verseker het daar sal hierdie somer geen beurtkrag wees nie terwyl die kragnutsmaatskappy hard daaraan werk om sy opwekkingsvermoё te verbeter. Eskom mik daarna om sy onbeplande verliese onder 13-duisend megawatt te hou. Waarnemende minister in die Presidensie, Maropene Ramokgopa, het aan joernaliste gesê die regering se energie-aksieplan het daartoe bygedra om beurtkrag te verminder:

# Ou Mutual en Sanlam berig daar is groot belangstelling onder kliënte in die nuwe tweepot-aftreestelsel. Ou Mutual het 190-duisend navrae ontvang en Sanlam 84-duisend. Daarteenoor het Ninety One en Coronation minder belangstelling in onttrekkings gehad, wat waarskynlik toegeskryf kan word aan hulle ryker kliëntebasis. Momentum het 19-duisend navrae verwerk, hoofsaaklik digitaal. Beramings vir totale onttrekkings wissel van 40-miljard- tot 100-miljard-rand in die eerste jaar. Verwerking van betalings kan tussen twee en 20 dae duur.

# Die Duitse polisie het ‘n gewapende man doodgeskiet naby die Nazi-dokumentasiesentrum en die Israelse konsulaat in München. Hy is opgemerk met ‘n vuurwapen en ‘n skietgeveg het uitgebreek met vyf polisielede. Die polisie het daarna besluit om sekerheid om München se hoof-sinagoge op te skerp. Die voorval het gebeur presies 52 jaar na die aanval op Israelse atlete deur die Palestynse militantegroep Black September tydens die Olimpiese Spele. Die konsulaat was tydens die voorval gesluit vir ‘n gedenkdiens vir die slagoffers van 1972.

# Rugby: Negentien Wêreldbeker-wenners speel Saterdag vir die Springbokke in die Rugbykampioenskapstoets teen die All Blacks in Kaapstad. Sacha Feinberg-Mngomezulu, Ruan Nortjé, Elrigh Louw en Gerhard Steenekamp is die enigste spelers sonder Wêreldbeker-ondervinding. Hoofafrigter Rassie Erasmus het sewe veranderings aan die wedstrydgroep aangebring wat Nieu-Seeland verlede naweek op Ellispark geklop het. Die wedstryd op die uitverkoopte Kaapstad-stadion is die 108ste tussen die twee aartsvyande en ‘n oorwinning behoort die Bokke te verseker van die kampioenskapstitel.

# En die finansiële aanwysers: Die rand verhandel teen 17-rand-72-sent teen die dollar, 19-rand-67-sent teen die euro en 23-rand-34-sent teen die pond. Bitcoin verhandel teen 56-duisend-667-dollar-26-sent. Die prys van goud is twee-duisend-515-dollar-36-sent per fynons en die prys van Brent-ruolie 73-dollar-29-sent per vat.

Bly ingeskakel vir meer nuus……………….