Nuus 17:00

BULLETIN NUUSAGENTSKAP 4 September 5 nm

Goeiemiddag. Ek is……..

In die bulletin:

# Minister Kubayi moedig sterker handelsbande aan tussen Suid-Afrika en China 
# AgriSA moedig meer belegging aan om landbou se potensiaal ‘n hupstoot te gee
# En, gholf: Christiaan Bezuidenhout van Suid-Afrika word gekies vir die Internasionale Span vir die Presidentsbeker in Kanada

# Die minister van Menslike Nedersettings, Mmamoloko Kubayi, beklemtoon die instelling van die ooreenkomste wat onderteken is tussen Suid-Afrika en China. Sy het gepraat op die Suid-Afrika-China-sakeforum in Beijing, en China se hoë tariewe uitgelig as ‘n versperring vir Suid-Afrikaanse maatskappye. Mmamoloko beklemtoon die belangrikheid van die deurvoer van China se vervaardigings-kundigheid vir werkskepping in Suid-Afrika, en die versterking van bilaterale bande en belegging:

# AgriSA vra meer belegging om die volle potensiaal van die landbousektor te ontsluit, wat broodnodig is vir ‘n gesonde ekonomie en voedselsekerheid. Die sektor het in die tweede kwartaal van die jaar ‘n afname getoon van 2,1-persent, ondanks ‘n styging van 0,4-persent in die nasionale bruto binnelandse produk. AgriSA se hoof-ekonoom, Kulani Siweya, vra voortgesette steun van die Departement van Landbou en die privaat sektor vir volhoubare groei en veerkragtigheid in die bedryf.

# PRASA verwelkom die 15-jaar-tronkstraf wat die Gespesialiseerde Handelsmisdaadhof sy voormalige werknemer Daniel Mthimkulu opgelê het. Mthimkulu is skuldig bevind aan bedrog, vervalsing en die wanvoorstelling van sy kwalifikasies. Hy is ook beveel om 5,7-miljoen-rand terug te betaal. PRASA beklemtoon die skuldigbevinding stuur ‘n sterk boodskap uit teen korrupsie en herbevestig die agentskap se vasberadenheid om veilige en bekostigbare spoorvervoer te verskaf.

# Gholf: Christiaan Bezuidenhout van Suid-Afrika is ingesluit as ‘n lid van die Internasionale Span vir vanjaar se Presidentsbeker-toernooi wat later die maand in Montreal, Kanada, plaasvind. Bezuidenhout het in 2022 sy buiging in die kompetisie gemaak. Hy sluit aan by die Kanadese Corey Conners, Taylor Pendrith en Mackenzie Hughes, Si Woo Kim van Suid-Korea en die Australiër Min Woo Lee, as Mike Lee se kapteinskeuses. Twaalf spelers uit vyf lande is ingesluit in die span om teen Amerika te staan te kom, onder aanvoering van Jim Furyk.

# Die finansiële aanwysers: Die rand verhandel teen 17-rand-89-sent teen die dollar, 19-rand-78-sent teen die euro en 23-rand-49-sent teen die pond. Bitcoin verhandel teen 56-duisend-544-dollar-8-sent. Die prys van goud is twee-duisend-488-dollar-84-sent per fynons en die prys van Brent-ruolie 73-dollar-28-sent per vat.

# En ten slotte: Die Nqweba-meteoriet wat op 25 Augustus met die krag van 92-ton dinamiet oor die Oos-Kaap ontplof het, sal deel word van Suid-Afrika se erfenis. Wetenskaplikes aan die Universiteit van die Witwatersrand sê die ontploffing het stukke naby Gqeberha gestrooi, wat insigte gee oor kosmiese verskynsels. Slindokuhle Mavuso van die Oos-Kaapse Erfenishulpbron-owerheid het die geskiedkundige waarde van wetenskaplike studies aan die SABC verduidelik:

Bly ingeskakel vir meer nuus……………….