Nuus 17:00

BULLETIN 9 Mei 5 nm

Goeiemiddag. Ek is……..

In die bulletin:

# Die minister van Arbeid beskryf die perseel van die gebou-ineenstorting in George as ‘n misdaadtoneel
# Die Nasionale Vergadering vertraag ‘n mosie oor die partybefondsingsgaping
# En, rugby: Die sukkelende Crusaders verwelkom twee All Black-losvoorspelers terug

# Die minister van Arbeid, Thulas Nxesi, het sy medelye uitgespreek na die ineenstorting van ‘n gebou in aanbou in George en die perseel as ‘n misdaadtoneel beskryf. Hy sê sy departement sal die ondersoek ten volle steun. Nxesi het politieke partye op die perseel gevra om nie die tragedie uit te buit nie en waarsku teen gissings. Hy het ook planne aangekondig om verskeie departemente, waaronder Internasionale Betrekkinge en Samewerking, te betrek by die ondersoek om kommunikasie te vergemaklik met buitelanders wat geraak word:

# Die Nasionale Vergadering het ‘n mosie oor die gaping in partybefondsingswetgewing vir ‘n week uitgestel. Daarvolgens word alle politieke partye toegelaat om onverklaarde skenkings te ontvang. News24 berig betrokkenes beraadslaag oor die Wet op die Befondsing van Politieke Partye, wat die regulasies onopgelos gelaat het. President Cyril Ramaphosa se onlangse goedkeuring van die wet verwyder regulasies wat die verklaring vereis van skenkings bo 100-duisend-rand, en skenkings beperk tot 15-miljoen-rand per jaar. Opposisiepartye bevraagteken die vertraging en vra duidelikheid oor die status van die wetgewing. Nog raadpleging is geskeduleer vir die volgende sitting.

# Die vakbond vir gesondheids- en algemene werkers, Haitu, het ‘n boikot aangekondig van Internasionale Verpleegkundigedag, om beswaar te maak teen uitbuiting en swak werksomstandighede. Die vakbond sê besteding op gesondheidsorg is kwaai gesny, daar is ‘n tekort aan basiese voorrade en toerusting, en hulle word uitgebuit deur arbeidsmakelaars. Haitu se hoofsekretaris, Lerato Mthunzi, sê verpleegkundiges word gedwing om hulle professionele belofte te verbreek weens onmoontlike werksomstandighede:

# Rugby: Die sukkelende Crusaders het twee All Blacks terugverwelkom. Codie Taylor keer terug na die verdedigende Super Rugbykampioen na sabatsverlof na die Wêreldbekertoernooi, terwyl Tamaiti Williams weer reg is na ‘n agterkniesening-besering. Die beleërde hoofafrigter, Rob Penney, sê die twee losvoorspelers sal baie waarde tot die span toevoeg. Die Crusaders het die kompetisie sewe agtereenvolgende jare gewen toe die huidige All Black-afrigter, Scott Robertson, aan die stuur was, maar kon tot dusver vanjaar net twee van hulle agt wedstryde wen.

# Die finansiële aanwysers: Die rand verhandel teen 18-rand-48-sent teen die dollar, 19-rand-88-sent teen die euro en 23-rand-8-sent teen die pond. Bitcoin verhandel teen 61-duisend-404-dollar-57-sent. Die prys van goud is twee-duisend-313-dollar-96-sent per fynons en die prys van Brent-ruolie 83-dollar-59-sent per vat.

# En, ‘n student van die Universiteit van Pretoria, Nicholas Joubert, het binne vyf jaar drie grade voltooi en terselfdertyd ‘n musiekloopbaan gebou en ‘n enkelsnit vrygestel. Die 28-jarige het onlangs ‘n meestersgraad in Strategiese Bestuur behaal. Hy het ook onderskeidelik in 2020 en ’22 grade in Sakebestuur en Kommunikasiebestuur behaal. Joubert se debuutliedjie, Someone New, is op die trefferlys van Suid-Afrikaanse radiostasies en selfs op speellyste in Brittanje en Australië. Hy sê ondanks sy toenemende gewildheid as musikant is hy vasberade om sy akademiese kwalifikasies uit te bou.

Bly ingeskakel vir meer nuus……………….