Nuus 16:00

BULLETIN 20 Mei 4 nm

Goeiemiddag. Ek is……..

In die bulletin:

# Mothibi sê die staatsaanklaer in die Sibanyoni-saak het onveilig gevoel
# Iran dreig met oorlog buite die streek as Amerika weer aanval
# En tennis: Novak Djokovic hoop om tyd te trotseer op Roland Garros

# Die hoof van die Nasionale Vervolgingsgesag, Andy Mothibi, sê die staatsaanklaer Mkhuseli Ntaba het vir sy veiligheid gevrees te midde van die hoëprofielsaak teen die taxibaas van Mpumalanga, Joe “Ferrari” Sibanyoni. Ntaba het nie by die Kwaggafonteinse Landdroshof opgedaag nie, waarna die saak van die rol geskrap en ‘n lasbrief vir sy inhegtenisneming uitgereik is. Die NVG het hom intussen geskors. Mothibi sê hulle ondersoek sy bewerings:

# Statistieke Suid-Afrika sê die jaarlikse inflasie vir voedsel en nie-alkoholiese drankies het verlede maand die derde agtereenvolgende maand afgeneem en tot 2,9-persent gedaal vanaf 3,6-persent in Maart. Ses van elf voedselkategorieë het laer koerse aangeteken, met vleis wat die grootste daling getoon het van 11,6-persent in Maart tot 9,4-persent in April. Statistieke SA se hoofdirekteur vir Prysstatistieke, Patrick Kelly, sê graanprodukte, insluitend mieliemeel, het die derde maand prysdalings getoon:

# Die voorstandersgroep March and March verwerp bewerings van xenofobie na ‘n betoging in Durban en sê dis verkeerd vertolk. Die groep sê die byeenkoms was die gevolg van gemeenskapsbekommernisse en nie vyandigheid teenoor buitelanders nie. Hy het kalmte versoek en inwoners aangespoor om opruiende slagspreuke te vermy wat spanning kan verhoog. Owerhede in Durban monitor glo die situasie noukeurig terwyl hulle dialoog tussen gemeenskappe en plaaslike leierskap aanmoedig om verdere onrus of misverstande te voorkom.

Nuus uit die buiteland: 

# Iran dreig om die oorlog verder as die Midde-Ooste uit te brei indien Amerika hom weer aanval. Dit volg nadat president Donald Trump gesê het hy was op die punt om die militêre veldtog te hervat. Iran het hierdie week ‘n nuwe aanbod aan Amerika voorgelê, maar die gepubliseerde weergawe herhaal voorwaardes wat Trump voorheen verwerp het. Dit sluit in eise vir beheer oor die Seestraat van Hormoes, vergoeding vir oorlogskade, die opheffing van sanksies, die vrystelling van bevrore bates en die onttrekking van Amerikaanse soldate.

# Tennis: Tyd is Novak Djokovic se grootste teenstander in die Franse Ope, wat Sondag begin. Die 24-malige Grand Slam-kampioen word Vrydag 39. Die Serwiër het nie meer die onverstoorde teenwoordigheid van ouds nie en sy beroemde uithouvermoë word nou bevraagteken terwyl jonger, sterker teenstanders oorheers. Djokovic kies nou meer watter toernooie om te speel en het ‘n meer pragmatiese benadering. Hy sê hy sou meer op klei wou speel voor Parys. Die trekking vir die mans-enkelspel vind môre plaas.

# En die finansiële aanwysers: Die rand verhandel teen 16-rand-59-sent teen die dollar, 19-rand-24 teen die euro en 22-rand-23-sent teen die pond. Bitcoin verhandel teen 77-duisend-351-dollar. Die prys van goud is vier-duisend-497-dollar-62-sent per fynons en die prys van Brent-ruolie is 104-dollar-57-sent per vat.

Bly ingeskakel vir meer nuus……………….