Nuus 16:00

NUUSFLITS NUUSAGENTSKAP 15 November 4 nm

Goeiemiddag. Ek is……..

In die bulletin:

# Beurtkrag sal nie die spesiale kiesersregistrasienaweek beïnvloed nie
# ActionSA kritiseer die immigrasiehervormings as ‘n pleister op ‘n koeëlwond
# En, krieket: Flintoff is Northern Superchargers se nuwe hoofafrigter in The Hundred      

# Die Onafhanklike Verkiesingskommissie het die publiek verseker kwessies rondom beurtkrag sal nie die bedrywighede tydens die naweek se kiesersregistrasie van stryk bring nie. Die uitvoerende hoof, Sy Mamabolo, het die jongste inligting verstrek oor die OVK se voorbereidings en sê die tegniese funksionering het die vermoë om beide aanlyn en vanlyn te werk. Hy het ook bevestig kwessies wat tydens oefensessies geïdentifiseer is, insluitend die oordrag van transaksies na die databasis, is reggestel. Mamabolo sê die OVK het infrastruktuurkwessies opgelos om ‘n gladde kiesersregistrasieproses te verseker:

Speel klankgreep:

# ActionSA het die minister van Binnelandse Sake, Aaron Motsoaledi, se hervorming van immigrasiewetgewing gekritiseer en beskryf dit as ‘n ‘pleister op ‘n koeëlwond’. Die party voer aan die kernkwessie is die wanfunksionele toestand van sy departement, en deurdringbare grense. Hulle is voornemens om voor die sperdatum in Januarie insette tot die witskrif te lewer. Partyleier Herman Mashaba bepleit seepgladde visumprosesse, teen-korrupsiemaatreëls, verwelkoming van bekwame beroepslui, en beleggers wat wettig tot die ekonomie bydra:

Speel klankgreep:

# ‘n Mobiele in vitro-bevrugtingslaboratorium, die eerste in die wêreld, is by die Universiteit van Pretoria onthul om minderbevoorregte gemeenskappe te help om toegang tot onvrugbaarheidsorg te kry. Dit is onthul tydens die Toegang-tot-onvrugbaarheidsorg-simposium. Die projek is in samewerking met die Hasselt Universiteit in België en die nie-winsgewende organisasie, The Walking Egg. Die waarnemende adjunk-direkteur van Mediese Wetenskap by die Steve Biko Akademiese Hospitaal se Reproduktiewe Biologie-laboratorium, Gerhard Boshoff, beklemtoon die doelwit is om gesteunde voortplantingstegnologie-dienste aan ekonomies benadeelde en onvrugbare paartjies in lae- en middelinkomste gemeenskappe te verskaf.

# Krieket: Die voormalige veelsydige speler en kaptein van Engeland, Andrew Flintoff, is aangewys as die hoofarigter van Northern Superchargers in The Hundred-kompetisie. Dit is die 45-jarige se eerste skof in so ʼn posisie nadat hy meer as 200 wedstryde vir sy land gespeel het in al drie formate. Hy het in 2009 uitgetree en was daarna ʼn kommentator, handelsmerk-ambassadeur en radio- en televisiekommentator. Flintoff, wat die bynaam Freddie het, het onlangs as konsultant-afrigter met die Engelse span gewerk. Superchargers se voorsitter, Kirsty Bashforth, beskryf hom as iemand wat inspireer en sal hulle help om ʼn unieke kultuur te ontwikkel.

# Die finansiële aanwysers: Die rand verhandel teen 18-rand-14-sent teen die dollar, 19-rand-70-sent teen die euro en 22-rand-61-sent teen die pond. Bitcoin verhandel teen 36-duisend-204-dollar-60-sent. Die prys van goud is een-duisend-971-dollar-68-sent per fynons en die prys van Brent ruolie 82-dollar-12-sent per vat.

# Om mee af te sluit: ʼn Sabeltandkatspesie is na die paleobioloog van die Universiteit van Kaapstad, Anusuya Chinsamy-Turan, vernoem. Chinsamy-Turan, van die Departement Biologiese Wetenskappe, is vereer vir haar baanbrekerswerk in die uitleg van die biologie van diere wat vyf- tot sewe-miljoen-jaar gelede aan die Weskus voorgekom het. Die gefossileerde oorblyfsels van die spesie is saam met ‘n ander nuwe spesie in die Weskus-fossielpark naby die Lugmagbasis Langebaanweg opgegrawe. Hierdie genus is ook ontdek in plekke wat van Kenia tot Tsjaad strek.

Bly ingeskakel vir meer nuus……………….