Nuus 16:00

BULLETIN NUUSAGENTSKAP 10 Desember 4 nm

Goeiemiddag. Ek is……..

In die bulletin:

# Ramaphosa vra verenigde pogings om die ekonomie ‘n hupstoot te gee
# Kaapstad help die polisie met sy ondersoek na ‘n beweerde ploftoestel by ‘n Joodse gemeenskapsentrum
# En, tennis: Aryna Sabalenka word aangewys as die WTA se speler van die jaar

# President Cyril Ramaphosa vra verenigde pogings op alle regeringsvlakke  om die ekonomie ‘n hupstoot te gee. Hy het in sy toespraak voor die uitvoerende gesag in Mpumalanga die belangrikheid van samewerking, medewerking en doeltreffende beplanning beklemtoon om inklusiewe ekonomiese groei te bevorder. Ramaphosa sê om strategieë en samewerking te belyn sal inklusiewe groei bevorder, werk skep en verseker ekonomiese voordele bereik alle Suid-Afrikaners:

# Die Stad Kaapstad staan ​​die polisie by in sy ondersoek na ‘n voorval waarin ‘n beweerde ploftoestel by die Joodse gemeenskapsentrum ontdek is. Burgemeester Geordin Hill-Lewis het bevestig die metropolisie help om kringtelevisiebeeldmateriaal te ontleed en die saak is aan die Valke oorhandig. Hy veroordeel enige moontlike aanval en bevestig Kaapstad se verbintenis om ‘n veilige stad te wees. Hill-Lewis sê die Moederstad spog met ‘n trotse geskiedenis van ‘n vreedsame plek vir mense van alle gelowe.

# Die Gautengse regering het die afgelope vyf jaar meer as 176-miljoen-rand weens finansiële wangedrag verloor, met meer as 16-miljoen-rand net in die 2023/24-boekjaar. ’n Verslag aan die staande komitee oor Openbare Rekeninge openbaar 253 sake, insluitend bedrog, diefstal en wanbesteding. DA-woordvoerder, Solly Mahlangu, versoek premier Panyaza Lesufi om fondse deur die Batebeslagleggingseenheid te verhaal en skuldige amptenare op ‘n swartlys te plaas. Hy bepleit ook versnelde dissiplinêre prosesse en beskerming van verklikkers:

# Die voormalige wêreldkampioen-fietsryer Rohan Dennis het skuld beken op ‘n aanklag oor ‘n voorval in Australië waartydens sy vrou en mede-Olimpiese medaljewenner, Melissa Hoskins, gesterf het. Sy is in Desember verlede jaar dood nadat sy voor hul huis in Adelaide getref is deur die voertuig wat hy bestuur het. Dennis se pleidooi beteken hy erken hy het ‘n motor bestuur toe Hoskins naby was, met die wete dat sy daad waarskynlik skade sal aanrig. Dennis, ‘n meervoudige wêreldkampioen op die pad en die baan, het verlede jaar uitgetree.

# Tennis: Die wêreld nommer-een, Aryna Sabalenka van Belarus, is die vroue-beroepsliggaam WTA se speler van die jaar nadat sy hierdie seisoen twee Grand Slam-titels ingepalm het – die Australiese Ope en die Amerikaanse Ope. Sy het ook die Cincinnati-ope in Amerika en die Wuhan-ope in China gewen. Die 26-jarige Sabalenka het Iga Swiatek boaan die wêreldranglys verbygesteek nadat die Poolse speler die posisie vir 11 maande beklee het. Die internasionale tennismedia het vir die wenner gestem.

# En die finansiële aanwysers: Die rand verhandel teen 17-rand-87-sent teen die dollar, 18-rand-81-sent teen die euro en 22-rand-78-sent teen die pond. Bitcoin verhandel teen 97-duisend-593-dollar. Die prys van goud is twee-duisend-676-dollar-18-sent per fynons en die prys van Brent-ruolie 71-dollar-73-sent per vat.

Bly ingeskakel vir meer nuus……………….