Nuus 16:00
BULLETIN NUUSAGENTSKAP 9 Desember 4 nm
Goeiemiddag. Ek is……..
In die bulletin:
# Brandstofprobleme veroorsaak vlugvertragings op die OR Tambo-internasionale lughawe
# Rugby: Skotland speel die eerste keer in 25 jaar teen Nieu-Seeland se Maori’s
# En, FNB maan Suid-Afrikaners om bonusse verantwoordelik te gebruik tydens die feestyd
# Die OR Tambo-internasionale lughawe in Gauteng het aangekondig hy ervaar tans uitdagings met brandstof, wat vlugvertragings veroorsaak. Die Lughawensmaatskappy van Suid-Afrika het bevestig tegnici is dringend aan die werk om die probleem op te los. Passasiers word aangeraai om hul lugrederye te kontak vir die jongste inligting oor vlugkennisgewings, of om die ACSA-toepassing te gebruik. Die lughawe het om verskoning gevra vir die ongerief en versoek geduld.
# Die DA sê hy fokus volgende jaar op die verbetering van bestuur en die lewering van infrastruktuur. Die party poog om kwessies soos vertragings met projekte en swak bestuur in beide die plaaslike en nasionale regering aan te pak. Die party beplan om verdere druk toe te pas vir sterker toesig, deursigtigheid en aanspreeklikheid, veral in infrastruktuurprojekte. Die DA-lid Dennis Ryder sê die party is daartoe verbind om dienslewering te verbeter en te verseker wetgewende prosesse is vaartbelyn vir beter regeringsdoeltreffendheid:
# Die kuberveiligheidsrisiko’s vir voertuie en laai-infrastruktuur van elektriese voertuie in Suid-Afrika neem toe namate die gewildheid daarvan in Suid-Afrika groei. Hierdie stelsels is kwesbaar vir kuberaanvalle, wat moontlik voertuigfunksionaliteit en persoonlike data in die gedrang kan bring. Kenners beklemoon hoe belangrik dit is om kuberveiligheid van die begin af te integreer. Mybroadband berig ‘n veelvlakkige sekerheidstelsel is van kardinale belang om infrastruktuur en data te beskerm en veilige en betroubare stelsels vir verbruikers te verseker.
# Rugby: Skotland speel volgende jaar die eerste keer in 25 jaar teen die Nieu-Seelandse Maori’s, as deel van hulle toer deur die Suidelike Halfrond. Die wedstryd in die Semenoff-stadion in Whangarei op 5 Julie is die begin van ‘n toer wat ook twee toetse insluit teen lande in die Stille Oseaangebied, wat nog bevestig moet word. Skotland se afrigter, Gregor Townsend, sê dit sal ʼn wonderlike geleentheid wees om hulle spelerspoel te vergroot en hulself teen sterk teenstanders te toets.
# Die finansiële aanwysers: Die rand verhandel teen 17-rand-83-sent teen die dollar, 18-rand-83-sent teen die euro en 22-rand-76-sent teen die pond. Bitcoin verhandel teen 98-duisend-126-dollar. Die prys van goud is twee-duisend-656-dollar-83-sent per fynons en die prys van Brent-ruolie 71-dollar-75-sent per vat.
# En ten slotte: FNB raai alle Suid-Afrikaners aan om hul Desember-bonus oordeelkundig aan te wend om hulself Januarie finansieel in ‘n goeie posisie te plaas. FNB se woordvoerder, Ester Ochse, sê dit is belangrik om ‘n gedeelte van die geld opsy te sit en nog ‘n gedeelte om te geniet. Volgens Ochse is die beste manier om 80-persent van die salaris en bonus vir Desember eenkant te hou vir finansiële doelwitte in die kort of lang termyn en vir finansiële welstand:
Bly ingeskakel vir meer nuus……………….