Nuus 16:00

BULLETIN NUUSAGENTSKAP 6 Desember 4 nm

Goeiemiddag. Ek is……..

In die bulletin:

# Die SAKP kap die hantering van Janusz Waluś se deportasieplan
# Die DA sê die wanfunksionaliteit in die Departement van Justisie lei tot die oorbevolkingskrisis in gevangenisse
# En, rugby: Saru-lede keur die privaat beleggingsvoorstel af

# Die SAKP is woedend omdat Janusz Waluś se deportasie na Pole op die nippertjie geskied. Waluś, wat die SAKP-leier Chris Hani in 1993 vermoor het, is in 2022 parool toegestaan. Sy parool eindig om middernag. Die SAKP kritiseer die regering omdat die Hani-familie baie laat in kennis gestel is en vra ‘n geregtelike ondersoek na Hani se sluipmoord. Die party en die Hani-familie eis die volle waarheid moet geopenbaar word, sodat daar geregtigheid kan wees. Hulle onderneem om hulle steeds vir geregtigheid vir Hani se nalatenskap te beywer.

# Die DA sê hy is erg onthuts oor die ondoeltreffendheid van die Departement van Justisie, soos blyk uit die skokkende min hofure en die ongelooflike agterstand met strafsake. DA-woordvoerder Jahno Engelbrecht sê hierdie mislukkings lei regstreeks tot die ernstige krisis met oorbevolking in gevangenisse wat die Departement van Korrektiewe Dienste moet hanteer. Hy meen dit bedreig die bestendigheid van die korrektiewe stelsel:

# Die Stad Kaapstad sê hy sal teen die middel van volgende jaar sy sakeplan gereed hê vir die oorname van die bestuur van passasiespoordienste in die metro. Dit volg na die raad se aanvaarding van ‘n omvattende spooruitvoerbaarheidstudie wat drie moontlike eienaarskapmodelle vir Kaapstad se passasierspoordienste aanbeveel. Burgemeester Geordin Hill-Lewis sê om die leisels by Metrorail oor te neem is belangrik vir lae-inkomste huishoudings wat jaarliks sowat 932-miljoen-rand sal spaar as treine loop soos dit moet:

# African Bank het ingestem om Eskom se huisleningsboek van 5,7-miljard-rand te koop. Die transaksie sal na verwagting teen Mei 2025 voltooi word, hangende goedkeuring. Eskom doen dit om hom te help om sy skuld te verminder, al verskaf hy reeds vir dekades huislenings aan werknemers. African Bank se uitvoerende hoof, Kennedy Bungane, sê die verkryging bied hom ‘n kans om sy veilige huislenings-aanbod uit te brei. Hy het ook planne uitgelig oor ‘n personeel-eienaarskap-skema en verhoogde SEB-betrokkenheid, wat ‘n breër transformasie aandui in African Bank se aandeelhouerstruktuur.

# Rugby: Lede van die Suid-Afrikaanse Rugby-unie het ʼn voorstel verwerp vir ʼn privaat belegging in die sport se kommersiële regte. Die voorstel het nie die verlangde meerderheid van 75-persent gekry nie nadat sewe van die 13 lid-unies dit teengestaan het. Die voorkeur-bieër, die Ackerley-sportgroep, het nou tot die einde van die maand om ʼn hersiene aanbod voor te lê. SARU se president, Mark Alexander, sê die unie se oogmerk is steeds om ʼn volhoubare en vooruitstrewende toekoms vir die sport te verseker op plaaslike en internasionale gebied.

# En die finansiële aanwysers: Die rand verhandel teen 18-rand-3-sent teen die dollar, 19-rand-9-sent teen die euro en 23-rand-4-sent teen die pond. Bitcoin verhandel teen 98-duisend-358-dollar. Die prys van goud is twee-duisend-640-dollar-60-sent per fynons en die prys van Brent-ruolie 71-dollar-28-sent per vat.

Bly ingeskakel vir meer nuus……………….