Nuus 16:00

BULLETIN NUUSAGENTSKAP 5 Desember 4 nm

Goeiemiddag. Ek is……..

In die bulletin:

# Die kabinet neem ferm standpunt in oor voedseloordraagbare siektes
# Die Wes-Kaap vaar die beste landwyd met lees, wiskunde en wetenskapstudies 
# En, fietsry: Meer as 900 atlete neem deel aan die wêreld se langste enkelskof-wedren deur die Namib-woestyn

# Die kabinet het besluit om maatreëls teen voedseloordraagbare siektes te versterk om openbare gesondheid te beskerm. Die regering sal hom toespits op beter regulasies vir voedselveiligheid, inspeksies en bewusmaking. Die minister in die Presidensie, Khumbudzo Ntshavheni, het aan die media gesê vinnige optrede is van kardinale belang om voedseloordraagbare siektes te voorkom en te bestuur om te verseker behoorlike maatreëls is getref om die publiek te beskerm teen gesondheidsgevare wat met kos verband hou:

# Die DA ondersteun die Departement van Basiese Onderwys se voorgestelde ingrypings nadat studies afnames in geletterdheid en syfervaardighede getoon het. Die verslae dui aan baie graad 6-leerders voldoen nie aan basiese lees- en wiskundestandaarde nie. Die DA verwelkom pogings om vroeë kinderontwikkeling te verbeter en moedertaalondersteunde tweetalige onderwys te bevorder. Die party-lid, Delmaine Christians sê hierdie maatreëls is noodsaaklik om beter opvoedkundige uitkomste te verseker:

Die Wes-Kaap het die beste gevaar met graad 5 en graad 9 Wiskunde en Wetenskap. Dit is volgens die Trends in International Mathematics and Science Study. Ten spyte van hierdie suksesse het prestasievlakke volgens berigte op baie gebiede gedaal, wat die uitwerking van die Covid-19-pandemie weerspieël. Bronagh Hammond van die Wes-Kaapse Onderwysdepartement beklemtoon die noodsaaklikheid om deurgaans te verbeter:

# Fietsry: Die wêreld se langste enkelskof-bergfietswedren, die Desert Dash, begin vroeg môreoggend in die Namibiese hoofstad, Windhoek. Dit eindig 24-uur later by Swakopmund aan die kus na ‘n moordende 401 kilometer deur die Namib-woestyn. Meer as 900 fietsryers het ingeskryf vir die wedren, wat vanjaar die 20ste keer plaasvind. Daar is 80 tweepersoonspanne, 156 vierpersoonspanne en 190 enkeldeelnemers. Vyftien atlete gaan ook meeding in die kategorie vir e-fietse. ‘n Nuwe kategorie vir mense oor 50 is vanjaar ingestel.

# Die finansiële aanwysers: Die rand verhandel teen 18-rand-5-sent teen die dollar, 19-rand-1-sent teen die euro en 22-rand-96-sent teen die pond. Bitcoin verhandel teen 102-duisend-918-dollar. Die prys van goud is twee-duisend-650-dollar-79-sent per fynons en die prys van Brent-ruolie 72-dollar-15-sent per vat.

# En ten slotte: Parys is die vierde agtereenvolgende jaar aangewys as die wêreld se aantreklikste stad op die Top 100 Stadsbestemmings-aanwyser van die data-ontledingsmaatskappy, Euromonitor International. Dit plaas stede op ‘n ranglys met die kriteria wat insluit toerisme, volhoubaarheid, ekonomiese prestasie, gesondheid en veiligheid. Madrid is tweede op die lys, gevolg deur Tokio, Rome en Milaan. Europa oorheers die ranglys met ses stede in die top tien.

Bly ingeskakel vir meer nuus……………….