Nuus 16:00

BULLETIN NUUSAGENTSKAP 21 November 4 nm

Goeiemiddag. Ek is……..

In die bulletin:

# ‘n Graad R-leerder van Gauteng sterf weens ‘n vermeende voedseloordraagbare siekte
# 71 pro-Iranse militante in Sirië sterf in Iraelse aanvalle
# En, rugby: Chris Laidlaw en Sergio Parisse is onder vyf nuwe ingehuldigdes in die Heldesaal

# Die Gautengse Onderwysdepartement het bevestig ‘n graad R-leerder van Dumezweni Primary in Diepkloof, Soweto, het gesterf en drie ander leerders is hospitaal toe geneem met soortgelyke simptome, nadat hulle versnaperinge geëet het. Die polisie stel ondersoek in, en ondersteuningsdienste is beskikbaar. Die departement se woordvoerder, Steve Mabona, sê LUR Matome Chiloane het medelye met die gesin betuig en wens die siek leerders ‘n spoedige herstel toe:

ActionSA het intussen die regering se afkondiging van ‘n ramptoestand verwelkom weens die voortslepende voedselvergiftigingskrisis wat met spazawinkels verbind word. Die party glo dit moes lankal gebeur het, maar beskou dit as ‘n deurslaggewende stap. Matthew George van ActionSA dring aan op vinnig optrede om die verklaring af te handel. Hy bepleit strenger toepassing om verdere verliese van onskuldige lewens te voorkom:

# Bayer het in samewerking met die reguleringsowerheid, SAHPRA, begin met die herroeping van Yaz Plus-voorbehoedpille weens ‘n verpakkingsfout. Die maatskappy het ‘n kennisgewing vir die herroeping van Lot WEW96J op sosiale media gepubliseer en dokters gevra om pasiënte in te lig en seker te maak die verpakkings wat ter sprake is, word uit sirkulasie onttrek. Sommige pakkies bevat 24 hormoonvrye tablette en slegs vier hormoontablette, wat die voorbehoedmiddel ondoeltreffend maak. Gebruikers moet hulle verpakkings nagaan en foutiewes terugstuur vir ‘n vervanging of terugbetaling. Volledige besonderhede oor die herroepingsproses word binnekort verwag.

# Een-en-sewentig pro-Iranse militante is in Iraelse aanvalle in die Siriese stad Palmyra dood, met meer as ‘n derde vegters uit Irak en Libanon. Die Siriese Observatorium vir Menseregte sê die slagoffers sluit 45 vegters van pro-Iranse Siriese groepe in, en 26 buitelandse vegters, waarvan die meeste aan die Irakse Al Nujaba-beweging behoort het, en vier aan die Libanese Hizbollah gewapende groep. Die aanvalle het drie gebiede in die stad geteiken wat bekend is vir sy antieke ruïnes, met een aanval wat ‘n byeenkoms van pro-Iranse groepe met leiers van Al-Nujaba en Hizbollah getref het.

# Rugby: Twee voormalige Nieu-Seelandse spelers en die Italiaanse legende, Sergio Parisse, tel onder die vyf nuwe ingehuldigdes in die sport se Heldesaal. Die 81-jarige Chris Laidlaw het vanaf 1963 tot 1970 skrumskakel gespeel vir die All Blacks en die sewes-spesialis, DJ Forbes, het sy land vanaf 2006 tot 2017 verteenwoordig. Parisse is die eerste Italianer om ingehuldig te word. Hy het 142 wedstryde vir die Azzurri gespeel en hulle in vyf Wêreldbekertoernooie verteenwoordig. Die ander twee is die Australiese Olimpiese gouemedaljewenner-sewes-ster Emilee Cherry Barton, en die Skotse speler Donna Kennedy.

# En die finansiële aanwysers: Die rand verhandel teen 18-rand-10-sent teen die dollar, 19-rand-5-sent teen die euro en 22-rand-88-sent teen die pond. Bitcoin verhandel teen 97-duisend-787-dollar. Die prys van goud is twee-duisend-664-dollar-65-sent per fynons en die prys van Brent-ruolie 73-dollar-90-sent per vat.

Bly ingeskakel vir meer nuus……………….