Nuus 15:00

BULLETIN 25 Augustus 3 nm

Goeiemiddag. Ek is……..

In die bulletin:

# Ramaphosa onthul infrastruktuurprojekte van 264-miljard-rand
# Die edelsteen-diefstalsaak teen Mkhwanazi is uitgestel
# En rugby: Deon Fourie kan Saterdag die oudste Springbok ooit word

# President Cyril Ramaphosa sê infrastruktuur is uiters belangrik vir ekonomiese groei en sterker skakeling in Suider-Afrika en
Afrika. Hy het die vyfde Simposium oor Volhoubare Infrastruktuurontwikkeling in Kaapstad aanlyn toegespreek. Ramaphosa sê betroubare paaie, spoorweë, hawens, energie, water en digitale netwerke is noodsaaklik om ondernemings te ondersteun en gemeenskappe te laat ontwikkel. Hy sê meer as 170 infrastruktuurprojekte van 264-miljard-rand behoort binne die volgende 12 tot 18 maande oopgestel te word:

# Vusimuzi “Cat” Matlala het voor die Madlanga-kommissie getuig hy en ‘n mede-sakeman, Hangwani Maumela, het in 2015 bevriend geraak danksy hul gedeelde belangstelling in sportmotors. Matlala sê hulle het gereeld in ‘n restaurant ontmoet en later sakebande ontwikkel. Hy getuig hulle het saam geld gegee om sakegeleenthede te verwesenlik, insluitend versoeke vir kwotasies. Matlala sê hul verhouding was persoonlik en finansieel:

# Die saak oor die beweerde diefstal van edelstene teen die geskorste adjunkhoof van die Ekurhuleni Metropolisie, Julius Mkhwanazi, is tot 18 September uitgestel. Mkhwanazi, Kgomotso Makhubo, Adrian Mackenzie en Keisha Stols, het vanoggend in die Johannesburgse Landdroshof verskyn. Hulle word aangekla van die diefstal van edelstene ter waarde van 14-miljoen-rand. Mkhwanazi het na bewering ‘n polisieklopjag in Killarney beplan om die edelstene te steel. Die saak is uitgestel sodat die staat sy saak kan voorberei en die dossier aan die verdediging bekend maak.

Rugby: Die 39-jarige veelsydige voorspeler Deon Fourie kan Saterdag die oudste Springbok ooit word nadat hy op die bank ingesluit is vir die toets teen die All Blacks in Kaapstad. Hy het sy internasionale buiging in 2022 gemaak en sy 13de en laaste toets in die volgende jaar se Wêreldbekertoernooi gespeel. Kaptein Pieter-Steph du Toit sal die elfde Bok word wat 100 toetse bereik. As Siya Kolisi speel, sal dit die mees ervare Bok-span ooit wees, met die opdrafspan wat altesaam een-duisend-en-12 toetse gespeel het.

# Die finansiële aanwysers: Die rand verhandel teen 15-rand-99-sent teen die dollar, 18-rand-65-sent teen die euro en 21-rand-79-sent teen die pond. Bitcoin verhandel teen 79-duisend-205-dollar. Die prys van goud is vier-duisend-640-dollar-49-sent per fynons en die prys van Brent-ruolie is 90-dollar-80-sent per vat.

# En ten slotte: Dis Geldslim-week en die tema is: Geldslim: Die Krag van Moontlikheid. Die onafhanklike digitale kredietverskaffer Prime Loans sê dis uiters belangrik dat finansiële opvoeding verder strek as om verbruikers te leer om geld te bestuur. Uitvoerende hoof Nita Morgan sê die Ou Mutual Spaar- en Beleggingsmonitor 2026 toon die persentasie werkende Suid-Afrikaners wat geld leen van onwettige leners, genaamd mashonisas, het die afgelope jaar toegeneem van 12- tot 19-persent:

Bly ingeskakel vir meer nuus……………….