Nuus 15:00

NUUSFLITS NUUSAGENTSKAP 16 November 3 nm

Goeiemiddag. Ek is……..

In die bulletin:

# Die hoof van Gift of the Givers in Gaza is tydens die konflik vermoor
# Cosatu veroordeel Malema se aanvalle op onderwysers met die minagting wat dit verdien
# En, padwedlope: ‘n Skotse atleet word vir ‘n jaar geskors omdat sy tydens ‘n marathon in ‘n motor ry

# Die Suid-Afrikaanse hulporganisasie Gift of the Givers het die dood bevestig van sy hoof in Gaza, Ahmed Abbasi, tydens die voortslepende konflik tussen Hamas en Israel. Hy en sy broer is dood toe hulle teruggekeer het van die oggendgebed. Die organisasie sê Abbasi het die mense van die gebied die afgelope 10-jaar met waardigheid gedien en verskeie projekte van stapel gestuur, insluitend die versorging van weeskinders, weduwees, bejaardes en siek mense. Water is ook deur hul ontsoutingsaanlegte gelewer, kospakkies is uitgedeel, maaltye is verskaf en beskadigde huise is opgeknap.

# Die vakbondfederasie, Cosatu, veroordeel met minagting die ongeregverdigde aanvalle op onderwysers deur die leier van die EFF, Julius Malema, en sy belediging van hul grondwetlike regte. Malema eis dat die Onafhanklike Verkiesingskommissie onderwysers verbied om in volgende jaar se verkiesings te werk, vanweë hulle vakbond-bande. Die woordvoerder van Cosatu, Matthew Parks, sê die Grondwet waarborg vryheid van assosiasie en uitdrukking, en bevestig die OVK se diskresie om individue aan te stel, ongeag lidmaatskap van ‘n vakbond. Parks raai Malema aan om grondwetlike beginsels te begryp en minder woedebuie op Twitter te plaas:

Play sound:

# Die DA sê sy beplande oorsigbesoek aan die Koeberg-kernkragstasie in Kaapstad is onder twyfelagtige omstandighede skielik gekanselleer. Die party beweer ondanks vroeëre goedkeuring is die besoek na veiligheidsklaring geskrap. Die besoek was bedoel om te kyk na vertragings met eenheid een se terugkeer tot diens, die beplande afsluiting van eenheid twee en die hernuwing van Koeberg se lisensie, wat moontlik energie-bestendigheid kan beïnvloed. ŉ Woordvoerder van die DA, Kevin Mileham, vermoed die minister van Openbare Ondernemings, Pravin Gordhan, was betrokke of dis ŉ poging om vrae te vermy oor die verlenging van Koeberg se lewensduur.

# Padwedlope: ‘n Skotse langafstand-atleet is vir ‘n jaar geskors nadat sy tydens ‘n wedren in ‘n motor gery en toe aanspraak gemaak het op die derde plek. Joasia Zakrzewski is uitgevang nadat data van die opsporingstelsel van die GB Ultras-marathon van Manchester na Liverpool getoon het sy het vier-kilometer in ‘n motor gery. Die Onafhanklike Tugpaneel van die Verenigde Koninkryk se atletiekliggaam het nie haar verduideliking aanvaar dat sy wel die organiseerders ingelig het sy het die wedloop op ‘n nie-mededingende manier voltooi nie. Die paneel sê sy moes nie die trofee aanvaar het nie.

# Die finansiële aanwysers: Die rand verhandel teen 18-rand-23-sent teen die dollar, 19-rand-79-sent teen die euro en 22-rand-61-sent teen die pond. Bitcoin verhandel teen 37-duisend-483-dollar-60-sent. Die prys van goud is een-duisend-966-dollar-3-sent per fynons en die prys van Brent ruolie 81-dollar-3-sent per vat.

# Ten slotte: Burgemeester Geordin Hill-Lewis sê tussengeloofleiers het weer bevestig dat Kaapstad ŉ stad van verskeidenheid, insluiting en verdraagsaamheid is. Die stad het vroeër die week sy jaarlikse Tussengeloofs-dialoog in die burgersentrum aangebied. Hill-Lewis sê in die lig van ernstige konflik in die wêreld op plekke soos die Demokratiese Republiek van die Kongo, Mali, Soedan, Oekraïne en veral in die Midde-Ooste, het tussengeloofleiers weer die waarde beklemtoon van elke mens se lewe, ongeag geloof of agtergrond:

Speel klankgreep:

Bly ingeskakel vir meer nuus……………….