Nuus 15:00

BULLETIN 27 Augustus 3 nm

Goeiemiddag. Ek is……..

In die bulletin:

# Kaapstad Toerisme pleit vir nasionale bestendigheid met die sektor se leierskapstryd wat vererger 
# Free SA beskryf die BELA-regulasies as ‘n bedreiging vir skole se selfbestuur
# En rugby: Fourie du Preez dink Faf de Klerk moet teen die All Blacks speel

# Kaapstad Toerisme waarsku dat nasionale leierskapsgevegte in die toerismesektor werksgeleenthede en ekonomiese groei in gevaar stel. Die waarskuwing volg terwyl Suid-Afrikaanse Toerisme woelinge ondervind met ‘n ontbinde direksie en geskorste uitvoerende hoof, Nombulelo Guliwe. Kaapstad Toerisme se uitvoerende hoof, Enver Duminy, sê die stad maak steeds uitstekende vooruitgang, met toerisme wat meer as 106-duisend werksgeleenthede ondersteun met meer as 24-miljard-rand in besoekersbesteding verlede jaar:

# Die burgerlike samelewingswaghond Free SA het die Wysigingswet op Basiese Onderwyswette veroordeel en sê dis ‘n uiters ondemokratiese magsgreep. Die organisasie sê die konsepreëls sal provinsiale departementshoofde verreikende magte gee om skoolbeheerliggame te oorheers oor toelatings, voedingsones en taalbeleide. Free SA waarsku dat dit ouerlike regte en gemeenskapsbesluitneming ondermyn, wat onderwys in ‘n gepolitiseerde slagveld verander. Die organisasie vra ouers en gemeenskappe om formeel beswaar te maak voor die sperdatum.

# Die adjunkminister van Elektrisiteit en Energie, Samantha Graham-Maré, het openbare en privaat instellings aangespoor om te help om 500 werklose gegradueerdes te werf vir opleiding as Energieprestasie-sertifikaatpraktisyns. Sewe-duisend-411 geboue is geregistreer en drie-duisend-986 sertifikate is uitgereik sedert die bekendstelling in 2020. Gauteng is aan die voortou met een-duisend-740, gevolg deur die Wes-Kaap met een-duisend-593. Graham-Maré sê die vaardigheidsontwikkelingsprogram sal gegradueerdes met data-ontledings-vaardighede toerus en groen werksgeleenthede skep:

# Rugby: Die legendariese voormalige Springbok-skrumskakel Fourie du Preez glo Faf de Klerk moet die nommer nege-trui dra in die Rugbykampioenskaps-toetse teen die All Blacks. De Klerk is op beseringsbystand terwyl Grant Williams, Morné van den Berg en Cobus Reinach ingesluit is vir die twee wedstryde in Nieu-Seeland. Du Preez sê De Klerk se ervaring sou van onskatbare waarde wees teen die Kiwi’s na sy uitblinkervertoning in die Bokke se beroemde oorwinning in Wellington in 2018, en sy gevestigde skakelpaar-vennootskap met Handré Pollard.

# Die finansiële aanwysers: Die rand verhandel teen 17-rand-77-sent teen die dollar, 20-rand-57-sent teen die euro en 23-rand-85-sent teen die pond. Bitcoin verhandel teen 111-duisend-259-dollar. Die prys van goud is drie-duisend-375-dollar-35-sent per fynons en die prys van Brent-ruolie 66-dollar-61-sent per vat.

# En om mee af te sluit: Navorsing aan die Universiteit van die Wes-Kaap toon hoe afmetings van tande kan help om liggame te identifiseer indien tradisionele maniere misluk. ‘n Nagraadse navorser, Krishka Ramchuran, het bevind die afstand tussen tande – slagtande, voorkiestande en kiestande – kan die mens se gestalte skat, wat ‘n waardevolle hulpmiddel vir forensiese ondersoekers sal bied. Haar studie het die groeiende rol van forensiese odontologie in Suid-Afrika beklemtoon, wat help om afsluiting aan gesinne te bied en misdaadondersoeke te ondersteun.

Bly ingeskakel vir meer nuus……………….