Nuus 15:00

BULLETIN 31 Maart 3 nm

Goeiemiddag. Ek is……..

In die bulletin:

# Onwettige medisynehandel gedy in Johannesburg terwyl immigrante hulle na die swartmark wend
#  Die Chinese slimfoon-vervaardiger Huawei se aandele tuimel met 28-persent
# En tennis: Die Filippynse speler Eala skiet op na 75ste op die wêreldranglys na haar skittervertoning in Miami

# ‘n Florerende swartmark vir onwettige medisyne het in Johannesburg ontstaan, hoofsaaklik vir immigrante wat sukkel om toegang tot gesondheidsorg te kry. Ground Up berig gesmokkelde medisyne soos antibiotika en voorbehoedmiddels word sonder voorskrif verkoop en omseil die Suid-Afrikaanse Regulerende Owerheid vir Gesondheidsprodukte. Die informele handel wek kommer oor openbare gesondheid omdat die verkeerde gebruik van medisyne tot newe-effekte en nagemaakte middels kan lei. Die owerheid, in samewerking met wetstoepassing, hanteer die kwessie.

# Die DA in Gauteng vra die onmiddellike skorsing van die voorsitter van die Tenderevalueringskomitee, Hulisani Tshikovhi, en ander wat betrokke is by die skandaal van nege-miljard-rand rondom ‘n voedselskema-tender. Sergio Isa dos Santos van die DA sê hierdie skema van die provinsiale Departement van Onderwys bedien meer as 1,6-miljoen leerders, hoofsaaklik uit minderbevoorregte gebiede. Hy sê hulle loop nou gevaar om noodsaaklike voeding te verloor en honger skool toe te gaan:

# Aandelemarkte in Asië en Europa het gedaal nadat die Amerikaanse president, Donald Trump, gesê het hy gaan hierdie week nuwe tariewe instel wat alle lande sal raak, nie net dié wat die grootste handelswanbalanse met sy land het nie. Die Nikkei in Japan het meer as vier-persent laer gesluit, in Brittanje was die FTSE 100 vanoggend 0,8-persent laer, terwyl die Dax in Duitsland en die Cac-40 in Frankryk albei een-persent laer was. Die goudprys het tot nog ‘n rekordhoogtepunt gestyg van meer as drie-duisend-124-dollar per fynons.

Die reuse-Chinese slimfoonvervaardiger Huawei het intussen aangekondig dat winste verlede jaar met 28-persent gedaal het, terwyl hy te kampe het met internasionale ekonomiese onsekerheid en swak verbruik tuis. Die Shenzhen-gebaseerde maatskappy is gewikkel in ‘n intense tweestryd tussen China en die Verenigde State nadat Washington gewaarsku het dat die Chinese regering sy toerusting kan gebruik vir spioenasie – ‘n bewering wat Huawei ontken. Sanksies het sedert 2019 die maatskappy se toegang tot Amerikaanse onderdele en tegnologieë verbied, wat hom gedwing het om sy groeistrategie uit te brei

# Tennis: Die jong Filippynse ster, Alexandra Eala, het van 140ste na 75ste op die wêreldranglys opgeskiet na haar skittervertoning op die Miami Ope in Amerika. Die 19-jarige produk van die Rafael Nadal-akademie in Spanje het drie Grand Slam-kampioene verslaan op pad na die halfeindronde, waar sy verloor het teen Jessica Pegula van Amerika, wat in die eindstryd vasgeval het. Die kampioen in Miami, Aryna Sabalenka van Belarus, bly nommer een, gevolg deur Iga Swiatek van Pole en drie Amerikaners – Coco Gauff, Pegula en Madison Keyes.

# En die finansiële aanwysers: Die rand verhandel teen 18-rand-36-sent teen die dollar, 19-rand-88-sent teen die euro en 23-rand-79-sent teen die pond. Bitcoin verhandel teen 81-duisend-969-dollar. Die prys van goud is drie-duisend-116-dollar-28-sent per fynons en die prys van Brent-ruolie 72-dollar-80-sent per vat.

Bly ingeskakel vir meer nuus……………….