Nuus 15:00

NUUSFLITS NUUSAGENTSKAP 14 November 3 nm

Goeiemiddag. Ek is……..

In die bulletin:

# Die werkloosheidskoers is laer op 31,9-persent
# Die DA sê Cope se afdanking van die Johannesburg se speaker vergroot die behoefte aan die ontbinding van die stadsraad
# En, sokker: Bafana is vol vertroue voor die Wêreldbeker-kwalifiseerders

# Die amptelike werkloosheidsyfer in Suid-Afrika in die derde kwartaal was 31,9-persent. Dit is 0,7 van ‘n persentasiepunt laer as die koers van 32,6-persent in die tweede kwartaal. Die Kwartaallikse Opname van die Arbeidsmag toon die aantal werkende mense in die derde kwartaal het met 399-duisend tot 16,7-miljoen toegeneem. Die aantal werklose mense het met 72-duisend tot 7,8-miljoen afgeneem. Die grootste toename van werkers was in finansies, gemeenskap- en maatskaplike dienste, en landbou terwyl die grootste verlies aan werkers in vervaardiging, mynbou, vervoer en nutsdienste aangeteken is. KwaZulu-Natal, Limpopo, Noordwes en Mpumalanga het die grootste verhogings in indiensnemings aangeteken.

# Die DA in Johannesburg sê volgens die reëls van die stadsraad beteken die vertrek van Colleen Makhubele uit COPE dat sy nie meer ‘n raadslid volgens proporsionele verteenwoordiging is nie en ook nie die speaker van die raad nie. Volgens die party is politieke onstabiliteit in Johannesburg die norm en onder Makhubele se leierskap het die raadsaal in ‘n sirkus verander. Volgens DA-woordvoerder, Belinda Kayser-Echeozonjoku, is haar vertrek uit COPE en die Raad die simptoom van ‘n siekte wat net een kuur het, naamlik die ontbinding van die raad van Johannesburg:

Speel klankgreep:

# Die Krugerwildtuin se bestuuur sê die Letaba-ruskamp is tans oorrompel deur sonbesies. Die bestuur waarsku besoekers oor die verskynsel, aangesien die klank, weens hul groot getalle, ‘n luidrugtige koor geword het. Hierdie insekte, bekend vir hul sporadiese verskynings, is skadeloos, maar is aangetrokke tot lig. SANParke se woordvoerder, Isaac Phaahla, raai gaste aan om hul deure in die aande toe te hou en stoepbeligting tot die minimum te beperk. Phaahla sê hulle getalle is hoog weens toestande soos die temperatuur, vogtigheid en reënval.

# Sokker: Bafana-Bafana begin hulle kwalifiseringsveldtog vir die 2026 Wêreldbeker Saterdag teen Benin in die Moses Mabhida-stadion in Durban. Drie dae later wag ŉ moeilike weg-wedstryd teen Rwanda. Bafana het nog nie sedert 2006 vir ŉ Wêreldbeker gekwalifiseer nie en nog nie weer ŉ belangrike titel op die vasteland gewen nie sedert die Afrika Nasiesbeker in 1996. Daar is vordering met afrigter, Hugo Broos, want die span is vir meer as ŉ jaar onoorwonne. Broos is oortuig hulle kan hulle goeie spelpeil voortsit:

Speel klankgreep:

# Die finansiële aanwysers: Die rand verhandel teen 18-rand-74-sent teen die dollar, 20-rand-9-sent teen die euro en 23-rand-2-sent teen die pond. Bitcoin verhandel teen 36-duisend-349-dollar-70-sent. Die prys van goud is een-duisend-946-dollar-47-sent per fynons en die prys van Brent ruolie 82-dollar-61-sent per vat.

# Om mee af te sluit: Die Onafhanklike Gemeenskapsaptekersvereniging van Suid-Afrika sê die vroeë diagnose en doeltreffende bestuur in die stryd teen tipe 2-diabetes is van deurslaggewende belang om die siekte te bekamp. Die organisasie het op Wêreld Diabetes-dag die kommerwekkende toename in nuwe gevalle beklemtoon, met 578-miljoen mense wat teen 2030 geraak sal word. Die uitvoerende hoof, Jackie Maimin, waarsku dat ŉ lewe met ongediagnoseerde diabetes dodelike gevolge kan hê en dring aan op pro-aktiewe gesondheidsorg-maatreëls.

Bly ingeskakel vir meer nuus……………….