Nuus 15:00

BULLETIN NUUSAGENTSKAP 6 Desember 3 nm

Goeiemiddag. Ek is……..

In die bulletin:

# Die regering bevestig Janusz Waluś sal gedeporteer word ná sy parooltydperk eindig
# SANParke skerp sekerheid in die Kruger-wildtuin op gedurende die feestyd
# En, rugby: Saru-lede keur die privaat beleggingsvoorstel af

# Die minister in die Presidensie, Khumbudzo Ntshavheni, het Janusz Waluś se deportasie ná die einde van sy parooltydperk bevestig. Waluś is destyds skuldig bevind van die sluipmoord op die leier van die SAKP, Chris Hani, in 1993. Die Konstitusionele hof het in 2022 parool aan hom toegestaan, en sy parooltydperk verstryk vandag. Ntshavheni sê aangesien Waluś nie meer Suid-Afrikaanse burgerskap het nie, hanteer die Departement van Binnelandse Sake sy deportasie na sy vaderland, Pole:

# Die regering moedig belangstellende burgers aan om aansoek te doen vir mynregte of permitte en nie by onwettige mynbou betrokke te raak nie. ‘n Myn moet vooraf toestemming kry by die Departement van Minerale en Petroleumbronne en mynregte of ‘n permit bekom om hul bedrywighede uit te voer. Die Wet op die Ontwikkeling van Minerale en Petroleumhulpbronne beheer die toekenning van regte en permitte wat verband hou met mynbou. Die regering het die ambagslui- en kleinskaalse mynboubeleid in 2022 ingestel om die mynbousektor ten volle te formaliseer en te reguleer.

# SANParke skerp gedurende die feestyd sekerheid op in die Kruger-wildtuin. Verskerpte maatreëls sluit in steekproewe met voertuie, uitkenning van nommerplate en meer veldwagter-patrollies. SANParke se Ondersoekeenheid vir Omgewingsmisdaad werk saam met wetstoepassingsagentskappe teen misdaad, insluitend stropery en valstrikke. Die veldtog behels ook samewerking met Mosambiekse owerhede om oorgrensstropery hok te slaan. SANParke versoek besoekers om waaksaam te bly en hul voertuie te beveilig terwyl hulle die wildtuin geniet.

# Rugby: Lede van die Suid-Afrikaanse Rugby-unie het ‘n voorstel verwerp vir ʼn privaat belegging in die sport se kommersiële regte. Die voorstel het nie die verlangde meerderheid van 75-persent gekry nie nadat sewe van die 13 lid-unies dit teengestaan het. Die voorkeur-bieër, die Ackerley-sportgroep, het nou tot die einde van die maand om ʼn hersiene aanbod voor te lê. SARU se president, Mark Alexander, sê die unie se oogmerk is steeds om ʼn volhoubare en vooruitstrewende toekoms vir die sport te verseker op plaaslike en internasionale gebied.

# Die finansiële aanwysers: Die rand verhandel teen 18-rand-4-sent teen die dollar, 19-rand-6-sent teen die euro en 22-rand-99-sent teen die pond. Bitcoin verhandel teen 98-duisend-78-dollar. Die prys van goud is twee-duisend-636-dollar-78-sent per fynons en die prys van Brent-ruolie 71-dollar-22-sent per vat.

# En ten slotte: Die kabinet wens alle Suid-Afrikaners ‘n veilige feestyd toe en vra almal om dit vreugdevol en veilig te hou. Motoriste moet padreëls gehoorsaam en nie onder die invloed bestuur nie. Ouers en voogde moet veral naby water waaksaam bly en kinders by swembaddens en strande onder toesig hou. Minister Ntshavheni sê mense moenie groot bedrae kontant dra nie en deurgaans bedag bly op hulle omgewing:

Bly ingeskakel vir meer nuus……………….