Nuus 15:00

BULLETIN NUUSAGENTSKAP 2 Desember 3 nm

Goeiemiddag. Ek is…….

In die bulletin:

# Die DA eis ‘n ondersoek na beweerde gedwonge vroeë aftrede by die Staatsveiligheidsagentskap
# Rugby: Die Haaie verbeter tot sesde op die VRK-punteleer na hulle oorwinning oor die Stormers in Durban
# En, Sanlam waarsku Suid-Afrikaners teen bedrieglike vooraf-fooi-leningskemas tydens die feestyd

# Die DA eis ‘n ondersoek na berigte dat die minister in die Presidensie, Khumbudzo Ntshaveni, alle werknemers van die Staatsveiligheidsagentskap van ouer as 50 opdrag gegee het om vroeg af te tree of afgelê te word. Die party waarsku die beplande herskikking kan lei tot ʼn aansienlike verlies aan kundigheid. DA-woordvoerder Dianne Kohler Barnard vra ʼn meer deurdagte benadering tot hervorming met ʼn behoorlike evaluering van die rol van elke werknemer en beplan om die aangeleentheid in die Parlement op te haal:

# Die Grensbestuursowerheid het 69 bykomende personeellede ontplooi na sleutel-grense vir dienslewering en tegniese ondersteuning. Die kommissaris, Michael Masiapato, sê die verdere ontplooiing van 400 junior grenswagte verbeter ook die owerheid se vermoë en versterk toegangsbeheer en sekerheid. Hy sê kuswagte is bygevoeg om monitering van maritieme grense in die feestyd te versterk:

# Die vyfde sitting van die Tussenregerings-onderhandelingskomitee vir ‘n Wêreldwye Plastiekverdrag het sonder enige ooreenkoms geëindig. Die Pan-Afrikaanse Plastiekprojek is teleurgesteld omdat dit nie die uitwerking van plastiekbesoedeling op gemeenskappe in oënskou geneem het nie. Intussen beklemtoon Graham Forbes van Greenpeace die behoefte aan meer ambisieuse en bindende teikens om die produksie van plastiek te verminder om gemeenskappe te beskerm. Ten spyte van die terugslae is meer as 100 lidlande verbind tot ‘n verdrag, met hoop op vordering in toekomstige onderhandelings.

# Rugby: Die Haaie het van negende tot sesde plek verbeter op die Verenigde Rugbykampioenskaps-punteleer nadat hulle die Stormers die naweek in Durban 21-15 verslaan het. Die Kaapstadse span bevind hulle in ʼn nagmerriejaar steeds in die 13de plek nadat die voormalige kampioen tot dusver net twee van hulle ses wedstryde kon wen. Die Bulle vaar die beste van die Suid-Afrikaanse spanne in die derde plek na Leinster en Glasgow Warriors nadat hulle tot dusver net een wedstryd verloor het. Die Leeus is vyfde na Cardiff.

# Die finansiële aanwysers: Die rand verhandel teen 18-rand-16-sent teen die dollar, 19-rand-10-sent teen die euro en 23-rand-7-sent teen die pond. Bitcoin verhandel teen 95-duisend-142-dollar. Die prys van goud is twee-duisend-642-dollar-21-sent per fynons en die prys van Brent-ruolie 72-dollar-47-sent per vat.

# En ten slotte: Sanlam vra Suid-Afrikaners om waaksaam te bly teen vooraf-fooi-leningskemas in die naderende feestyd. Ayanda Ndimande van Sanlam-kredietoplossings het aan Citizen gesê bedrieërs teiken verbruikers wat geldelik sukkel deur groot lenings teen lae rentekoerse aan te bied, en voorafbetalings te eis wat uitloop op geen uitbetalings. Ndimande beklemtoon die behoefte aan rooivlae, wat grootmaat-e-pos-kontakte insluit. Sy sê mense moet hulle persoonlike data beskerm, kredietverslae nagaan, en enige verdagte bedrywighede by die bank en die polisie aanmeld.

Bly ingeskakel vir meer nuus……………….