Nuus 15:00

BULLETIN NUUSAGENTSKAP 22 November 3 nm

Goeiemiddag. Ek is……..

In die bulletin:

# ‘n Varkboer se borgtogaansoek word uitgestel tot Februarie na ‘n grusame dubbele moord in Limpopo
# China vra die Internasionale Strafhof om objektief en regverdig te bly
# En, rugby: Frankryk en Argentinië skop die naweek se toetsaksie in Parys af

# Die borgtogaansoek van ‘n boer van Limpopo wat daarvan beskuldig word dat hy twee vroue vermoor en hulle liggame aan varke gevoer het, is in die Landdroshof in Mankweng tot 18 Februarie uitgestel. Zachariah Olivier en twee ander mans is in Augustus in hegtenis geneem na die grusame ontdekking. Die hof is vanoggend meegedeel Olivier se regsverteenwoordiger is nie beskikbaar nie. Die twee ander beskuldigdes, die plaastoesighouer Adriaan de Wet en die werker William Musora, het vroeër hulle borgtogaansoeke laat vaar.

# Die DA sê die regering moet plaaslike owerhede en privaat kragverskaffers toelaat om krag onafhanklik op te wek en aan te koop. Die party het sy kommer uitgespreek oor Eskom se voorgestelde kragtariefverhogings. Rikus Badenhorst van die DA sê hulle stel subsidies voor vir lae-inkomste huishoudings en energie-doeltreffende aansporings om te verseker alternatiewe energiebronne is toeganklik en bekostigbaar:

# China het die Internasionale Strafhof aangemoedig om objektief en regverdig te bly nadat ‘n lasbrief uitgereik is vir die inhegtenisneming vir die Israelse eerste minister, Benjamin Netanyahu, en ander. Die ministerie van Buitelandse Sake se woordvoerder, Lin Jian, sê China hoop die hof sal sy mag uitoefen in ooreenstemming met die wet. China is, soos Israel en die Verenigde State, nie ‘n lid van die hof nie. China sê hy ondersteun enige pogings van die internasionale gemeenskap oor die Palestynse kwessie om regverdigheid en geregtigheid te bereik.

# Rugby: ‘n Naweek vol toetsaksie wag weer op aanhangers. Frankryk en Argentinië skop die verrigtinge vanaand in Parys af, terwyl Ierland en Fidji môre in Dublin speel. Dan volg die verwagte reuse-botsing tussen die Springbokke en Wallis in Cardiff. Die gasheer moet probeer om ná elf agtereenvolgende nederlae weer te wen, terwyl die Bokke daarna mik om die eerste keer sedert 2013 hul jaareindtoer onoorwonne af te sluit. Italië speel Sondag in La Nucia teen die All Blacks, terwyl Australië en Skotland mekaar in Edinburgh die stryd aansê.

# Die finansiële aanwysers: Die rand verhandel teen 18-rand-6-sent teen die dollar, 18-rand-82-sent teen die euro en 22-rand-62-sent teen die pond. Bitcoin verhandel teen 98-duisend-497-dollar. Die prys van goud is twee-duisend-706-dollar-39-sent per fynons en die prys van Brent-ruolie 73-dollar-80-sent per vat.

# En ten slotte: Statistieke Suid-Afrika berig ‘n afname in hofsake oor siviele skuld in sy jongste opname vir September. Siviele dagvaardings vir skuld het in die derde kwartaal met 12-persent gedaal vergeleke met dieselfde tydperk verlede jaar. Siviele vonnisse vir skuld het ook op ‘n jaargrondslag met 6,7-persent gedaal. Statistieke SA se woordvoerder, Onica Mushwana, sê die totaal vir vonnisse het altesaam 298,8-miljoen-rand beloop, met lenings en dienste die vernaamste bydraers:

Bly ingeskakel vir meer nuus……………….