Nuus 15:00

BULLETIN NUUSAGENTSKAP 21 November 3 nm

Goeiemiddag. Ek is……..

In die bulletin:

# Voedseloordraagbare siektes word tot ‘n nasionale ramp verklaar
# Bayer herroep die Yaz Plus-geboortebeperkingspille weens ‘n verpakkingsfout
# En, motorsport: Max Verstappen kan die F1-titel reeds die naweek in Las Vegas beklink

# Die Nasionale Rampbestuursentrum het ‘n nasionale ramp verklaar weens ‘n toename in voedseloordraagbare siektes as gevolg van swak voedselveiligheid. Minstens 890 gevalle van voedseloordraagbare siektes is aangemeld, hoofsaaklik in Gauteng en KwaZulu-Natal, en daarom word ‘n  multisektorale noodlenigingsplan voorgestel. Die minister van Gesondheid, Aaron Motsoaledi, het op ‘n nuuskonferensie gesê die regering werk aan ‘n plan om die krisis aan te pak en voedselveiligheid landwyd te verbeter:

# Die Parlement se portefeuljekomitees oor Wetenskap, Tegnologie en Kommunikasie het kommer uitgespreek oor die ruimte-kommunikasie-satellietprojek, ter waarde van 100-miljoen-rand. Die lede het klem gelê op die bedreiging van sabotasie tydens verkryging en vervaardiging en verwys na voorvalle uit die verlede. Die komitees het steun vir die projek uitgespreek aangesien dit ten doel het om kommunikasiekoste te verminder deur uitkontraktering uit te skakel. Hulle het egter die behoefte aan ‘n omvattende sakeplan en deurlopende toesig beklemtoon om suksesvolle inwerkingstelling te verseker.

# Die DA het ‘n plan onthul om die afpersing verskans in sektore soos die boubedryf, vervoer, gesondheidsorg en mynbou te bekamp. Die plan sluit in om ‘n sentrale intelligensie-eenheid te skep, streeks-teen-afpersingspanne in te stel en beter ondersteuning vir slagoffers te bied. Ian Cameron van die DA versoek sterker vennootskappe met gemeenskappe en meer beskerming vir mense wat afpersing aanmeld. Hy glo hierdie benadering is die sleutel tot die bekamping van skade wat afpersing aan ondernemings en kwesbare gemeenskappe veroorsaak:

# Bayer het begin met ‘n herroeping as gevolg van ‘n verpakkingsfout met Yaz Plu-geboortebeperkingspille, Lot WEW96J. Dit word gedoen in samewerking met die reguleringsowerheid, SAHPRA. Die maatskappy het die kennisgewing van die herroepings op sosiale media gepubliseer en mediese beroepslui versoek om pasiënte in te lig en te verseker verpakkings wat geraak is word uit sirkulasie onttrek. Sommige pakkies bevat 24 hormoonvrye tablette en slegs vier hormoontablette, wat die voorbehoedmiddel ondoeltreffend maak. Gebruikers moet hulle verpakkings nagaan en foutiewes terugstuur vir ‘n vervanging of terugbetaling. Besonderhede oor die herroepingsproses word verwag.

# Motorsport: Red Bull se Nederlandse renjaer, Max Verstappen, kan reeds hierdie naweek in Las Vegas die Formule Een-kampioenskap beklink en sal dan slegs die sesde bestuurder word wat vier titels inpalm. Voor hom was dit slegs Michael Schumacher, Lewis Hamilton, Juan Manuel Fangio, Alain Prost en Sebastian Vettel wat hierdie mylpaal kon bereik. Verstappen is tans 62 punte voor McLaren se Britse jaer, Lando Norris, met net die wedrenne in Vegas, Katar en Abu Dhabi wat hierdie seisoen oorbly.

# En die finansiële aanwysers: Die rand verhandel teen 18-rand-9-sent teen die dollar, 19-rand-4-sent teen die euro en 22-rand-87-sent teen die pond. Bitcoin verhandel teen 98-duisend-219-dollar. Die prys van goud is twee-duisend-672-dollar-59-sent per fynons en die prys van Brent-ruolie 73-dollar-62-sent per vat.

Bly ingeskakel vir meer nuus……………….