Nuus 15:00

BULLETIN NUUSAGENTSKAP 4 September 3 nm

Goeiemiddag. Ek is……..

In die bulletin:

# Die MK-party verwelkom die BRICS-bank se lening aan die Suid-Afrikaanse regering
# Giwusa eis die einde aan die korporatiewe monopolie in die voedselbedryf
# En, rugby: Kaapstad sal Saterdag die haka respekteer

# Die MK-party verwelkom en waardeer die BRICS-bank se lening van 17,86-miljard-rand aan die Suid-Afrikaanse regering om water- en sanitasie-infrastruktuur te ontwikkel. Floyd Shivhambu van die MK-party sê hulle waardeer ook die lening van vyf-miljard-rand aan Transnet. Shivhambu sê hulle weet sulke lenings kom sonder die neo-liberale en neo-koloniale voorwaardes wat gewoonlik met lenings van die Wêreldbank en die Internasionale Monetêre Fonds gepaardgaan:

# Die algemene werkersvakbond, Giwusa, eis ‘n einde aan die korporatiewe monopolie van die voedselbedryf. Hulle vra ook steun vir bestaans- en kleinskaalse boere om die basis van voedselproduksie en -verspreiding te verbreed. Giwusa se president, Mametlwe Sebei, sê volgens FoodForward SA, word 10-miljoen-ton kos elke jaar in Suid-Afrika vermors. Hy sê dit kom neer op 60-miljard-rand se voedsel wat tot niet gaan:

# Sewe mense, drie van hulle kinders, is dood in die stad Lviv, in die weste van Oekraïne, tydens ‘n nuwe reeks Russiese aanvalle. Die aanval kom terwyl Oekraïne steeds tot verhaal kom na gister se dood van minstens 50 mense by ʼn militêre instituut in die sentrale stad, Poltava. Volgens amptenare was vandag se aanval met hommeltuie en hipersoniese missiele. Oekraïne se Weermag sê die hele land is nou op gereedheid vir ʼn lugaanval.

# Rugby: SA Rugby beloof daar sal nie weer ‘n geraas tydens die haka wees tydens Saterdag se Rugbykampioenskapstoets tussen die Springbokke en die All Blacks in Kaapstad nie. Nieu-Seeland Rugby het SA Rugby se verskoning aanvaar vir die harde musiek, vuurwerke en ʼn passasiersvliegtuig oor Ellispark terwyl die Kiwi’s verlede naweek hulle tradisionele oorlogsdans uitgevoer het. Die oorsprong van die haka dateer terug tot die All Blacks se toer deur Europa in 1905. Hulpafrigter Jason Ryan sê die Bokke het, soos altyd, die uitdaging gerespekteer.

# Die finansiële aanwysers: Die rand verhandel teen 17-rand-91-sent teen die dollar, 19-rand-79-sent teen die euro en 23-rand-50-sent teen die pond. Bitcoin verhandel teen 56-duisend-456-dollar-23-sent. Die prys van goud is twee-duisend-488-dollar-29-sent per fynons en die prys van Brent-ruolie 74-dollar-24-sent per vat.

# En ten slotte: Sir Elton John het bekendgemaak hy het net beperkte sig in sy een oog oor na ‘n ernstige ooginfeksie. Die 77-jarige sanger het op Instagram aan sy 4,9-miljoen aanhangers gesê hy is besig om te herstel, maar dit is ʼn uiters stadige proses en kan ʼn rukkie duur voor die sig in die beskadigde oog terugkeer. Sir Elton het verlede jaar by Glastonbury aangekondig hy gaan nie meer toer nie. Die dokumentêre rolprent, Elton John: Never Too Late, se Europese bekendstelling vind later vanjaar op die Londense Rolprentfees plaas.

Bly ingeskakel vir meer nuus……………….