Nuus 15:00

BULLETIN NUUSAGENTSKAP 13 Augustus 3 nm

Goeiemiddag. Ek is……..

In die bulletin:

# Die werkloosheidskoers styg tot 33,5-persent in die tweede kwartaal van 2024
# Rugby: Rassie maak 10 veranderings aan die beginspan vir die Perth-toets teen die Wallabies
# En die minister van Sport, Kuns en Kultuur herhaal die behoefte aan beter vergoeding vir atlete

# Statistieke Suid-Afrika se jongste kwartaallikse arbeidsmagopname toon die werkloosheidskoers het in die tweede kwartaal van die jaar tot 33,5-persent gestyg, van 32,9-persent in die eerste kwartaal. Indiensneming het met 92-duisend gestyg tot 16,7-miljoen, terwyl werkloosheid met 158-duisend toegeneem het tot 8,4-miljoen mense. Die meeste werksverliese het in die Wes-Kaap,  Mpumalanga en KwaZulu-Natal voorgekom, terwyl Gauteng en Limpopo toenames ondervind het. Dihlolelo Phoshoko van Statistieke SA sê werkloosheid onder vroue het ook tot 35,8-persent gestyg:    

# Die Kapitaalbestedingsmonitor van Nedbank toon in die eerste helfte van 2024 ‘n toename in die aankondiging van nuwe projekte en staan op 797,7-miljard-rand in vergelyking met 193,2-mijard-rand vir die hele 2023. Die styging word toegeskryf aan verbeterings met kragtekorte, logistiek en inflasie. Nedbank verwag egter ‘n daling van 2,5-persent in die bruto vasgestelde kapitaalvorming vir 2024 weens die lang aanlooptyd vir die aanvang van projekte. Die algemene regeringsektor het die meeste planne van 393,3-miljard-rand insluitende groot behuising- en waterprojekte.

# Build One South Africa versoek die inkomende burgemeester van Johannesburg om aan twee kritieke kwessies aandag te gee, naamlik die maandelikse heffing van 200-rand vir elektrisiteit en die verouderde register vir behoeftiges. Volgens die party sal die verwydering van die heffing die finansiële las van inwoners verlig terwyl die opdatering van die register noodsaaklik is om te verseker kwesbare inwoners ontvang gratis basiese dienste. BOSA se woordvoerder, Ayanda Allie, sê die party is gretig om met die nuwe administrasie te werk ten einde aandag te gee aan dringende kwelpunte en dienslewering te verbeter:

# Rugby: Salmaan Moerat voer ‘n Springbok-groep met ‘n nuwe voorkoms aan in Saterdag se tweede toets teen die Wallabies in Perth. Hoofafrigter Rassie Erasmus het 10 veranderings aan die beginspan aangebring wat Australië in die eerste toets in Brisbane 33-7 kafgedraf het. Die gereelde kaptein, Siya Kolisi, kry ‘n blaaskans. Die enigste ander spelers wat in die opdrafspan oorbly, is Cheslin Kolbe, Jesse Kriel, Sacha Feinberg-Mngomezulu, Elrigh Louw en Pieter-Steph du Toit. Die slot Ruan Nortjé en die skrumskakel Morné van den Berg begin die eerste keer ‘n toets.

# Die minister van Sport, Kuns en Kultuur, Gayton McKenzie, het die behoefte aan beter vergoeding vir atlete herhaal. McKenzie het lede van Span Suid-Afrika op die OR Tambo Internasionale Lughawe terugverwelkom en die atlete gelukgewens wat aan die Olimpiese Spele in Parys deelgeneem het. Hy beklemtoon dat sport die mag het om gemeenskappe te verenig, en dring daarop aan dat die regering sportfinansiering vir atlete hersien:

# En die finansiële aanwysers: Die rand verhandel teen 18-rand-16-sent teen die dollar, 19-rand-94-sent teen die euro en 23-rand-23-sent teen die pond. Bitcoin verhandel teen 58-duisend-754-dollar-26-sent. Die prys van goud is twee-duisend-463-dollar-52-sent per fynons en die prys van Brent-ruolie 82-dollar-2-sent per vat.

Bly ingeskakel vir meer nuus……………….