Nuus 14:00

BULLETIN 12 November 2 nm

Goeiemiddag. Ek is……..

In die bulletin:

# President Cyril Ramaphosa vra ‘n regstelsel wat mense dien
# FORUM4SA eis aanspreeklikheid oor NERSA se onregmatige munisipale elektrisiteitstariewe in drie metro’s
# En Nvidia se raad oorweeg lot van skandaal-geteisterde hoof Jensen Huang

# President Cyril Ramaphosa sê geregtigheid moet vir almal toeganklik wees, veral vir kwesbare gemeenskappe. Hy het op die Internasionale Konferensie oor Toegang tot Geregtigheid in Sun City, Noordwes, gepraat. Ramaphosa sê die regstelsel moet menseregte en menswaardigheid beskerm en gelyke regte verseker, en die wet mag nie gebruik word vir onderdrukking of uitsluiting nie. Hy sê grondwetlike demokrasie vereis aanspreeklikheid, gelykheid en gelyke beskerming:

# Dit is Verantwoordelike Dobbelmaand en die Nasionale Dobbelraad vra Suid-Afrikaners om verantwoordelik te dobbel en bedag te wees op moontlike finansiële en maatskaplike gevolge. Die jongste bedryfstatistiek toon dobbelinkomste het in die vorige boekjaar 84,5-miljard-rand bereik. Die raad se waarnemende uitvoerende hoof, Lungile Dukwana, sê weddenskappe was verantwoordelik vir 74-persent van die nasionale bruto dobbelinkomste en het 62,2-miljard-rand ingebring – ‘n groei van 19,6-persent vergeleke met die vorige boekjaar:

# Forum for South Africa het kommer uitgespreek oor die Nasionale Energiereguleerder van Suid-Afrika se jongste onthullings oor tariewe. Die energiereguleerder het in die Hooggeregshof in Pretoria erken dat die elektrisiteitstariewe wat hy in die vorige boekjaar goedgekeur het vir die Johannesburg-, Ekurhuleni- en Nelson Mandelabaai-metro’s, asook twee plaaslike munisipaliteite, Emfuleni in Gauteng en Madibeng in Noordwes, onregmatig was. FORUM4SA se leier, Tebogo Mashilompane, sê ‘n onafhanklike ondersoek moet uitgevoer word na NERSA se ernstige berekeningsfoute:

# Die raad van die Amerikaanse tegnologie-reus Nvidia oorweeg glo uitvoerende hoof Jensen Huang se afdanking na berigte van nog ‘n buite-egtelike verhouding. New York Times het berig hy het ‘n verhouding gehad met die maatskappy se vise-president vir Gesondheidsorg, Kimberley Powell. Nvidia het reeds met ‘n ondersoek begin na Huang se verhouding met die beweerde Chinese spioen Alice Huang. Die FBI doen ook sy eie ondersoek. Die maatskappy het net dié week reeds meer as vier-duisend-miljard-rand se markwaarde verloor.

# Sokker: ‘n Knie-sening-besering gaan Frankryk se kaptein, Kylian Mbappé, uit vanaand se Nasiesliga-wedstryd teen Italië in Milaan hou. Afrigter Zinedine Zidane sê hy dink nie dis ernstig nie, maar sal niks waag met sy spelskepper nie en hoop eerder hy is fiks vir Sondag se kragmeting met Turkye in Bordeaux. Frankryk is tans boaan Groep A1. Mbappé het sy land se laaste drie wedstryde weens beserings misgeloop. Hy het hierdie seisoen 17 doele aangeteken in alle wedstryde vir sy Spaanse klub, Real Madrid.

# En die finansiële aanwysers: Die rand verhandel teen 16-rand-62-sent teen die dollar, 18-rand-44-sent teen die euro en 22-rand-7-sent teen die pond. Bitcoin verhandel teen 73-duisend-502-dollar. Die prys van goud is drie-duisend-949-dollar-41-sent per fynons en die prys van Brent-ruolie is 94-dollar-34-sent per vat.

Bly ingeskakel vir meer nuus……………….