Nuus 14:00

BULLETIN 30 Oktober 2 nm

Goeiemiddag. Ek is……..

In die bulletin:

# Nomvalo beweer vals intelligensieverslae is agter sy afdanking as MK se sekretaris-generaal
# ‘n Hulpkonvooi vertrek na die Russies-beheerde Olesjki in Oekraïne
# En rugby: ‘n Paar veranderings aan die Springbok-vrouespan vir die tweede toets teen Ierland

# Die voormalige sekretaris-generaal van die MK-party, Sibonelo Nomvalo, beweer sy afdanking is deur ‘n interne politieke kartel bewerkstellig deur versinde intelligensieverslae te gebruik. Sy verwydering kort voor volgende week se munisipale verkiesing kom te midde van berigte oor verdeelheid binne die party. Die MK het glo ongemagtigde administratiewe besluite as rede aangevoer. Nomvalo het aan die media gesê hy het aan partyleier Jacob Zuma verduidelik verskeie senior figure het teen hom saamgesweer:

Die nasionale woordvoerder van die anti-immigrasie-organisasie March and March, Sandile Dube, moedig Suid-Afrikaners intussen aan om in groot getalle deel te neem aan die verkiesing. Hy het in Durban die regering die skuld gegee vir openbare ontevredenheid en verwerp bewerings dat die beweging betogings aanhits. Hy vra kiesers om kalm te bly en politieke partye te verwyder wat nie hul belange dien nie. Dube sê die beweging wag op ‘n regsmening rakende sy beplande optogte:

Nuus uit die buiteland:

# ‘n Hulpkonvooi met onder meer kos en mediese voorrade het oornag vertrek na die Russies-beheerde dorp Olesjki in die suide van Oekraïne. Die Russiese koerant Izvestia berig dit volg ná weke se pogings om ‘n hulpoperasie vir inwoners van die swaar geteisterde dorp te reël. Russiese magte het Olesjki beset kort ná Moskou se inval in Oekraïne in Februarie 2022. Joernaliste van Frankryk, Italië, Rusland, Oekraïne en Amerika vergesel die konvooi.

# Rugby: Yonela Ngxingolo sak môre in Kaapstad in die voorry vir die Springbok-vroue in die plek van die beseerde Sanelisiwe Charlie in die tweede toets teen Ierland. Die gasvroue het verlede week 45-27 verloor in die eerste W-15-wêreldreekstoets teen die Iere. Catha Jacobs skuif van slot na flank en Mary Zulu word van die bank bevorder na die nommer 10-trui. Die mede-afrigter, Laurian Johannes-Haupt, sê dit behoort tot ‘n beter uitslag te lei:

En finansiële nuus: Die goudprys het weer tot onder vier-duisend-dollar per fynons gedaal terwyl stygende oliepryse en hoër Amerikaanse inflasie vrese laat ontstaan vir verdere rentekoers-verhogings. Goud het vroeër vandag 0,6-persent laer verhandel teen drie-duisend-997-dollar-39-sent. KCM Trade se hoof-markontleder, Tim Waterer, sê beleggers het voorheen ingetree om goud te koop wanneer die prys daal, en so gehelp om verdere verliese te beperk. Hy sê dis egter onseker of kopers hierdie keer sal terugkeer.

Die rand verhandel tans teen 16-rand-64-sent teen die dollar, 18-rand-64-sent teen die euro en 22-rand-35-sent teen die pond. Bitcoin verhandel teen 77-duisend-245-dollar. Die prys van goud is drie-duisend-984-dollar-2-sent per fynons en die prys van Brent-ruolie is 118-dollar-38-sent per vat.

Bly ingeskakel vir meer nuus……………….