Nuus 14:00

BULLETIN NUUSAGENTSKAP 11 Junie 2 nm

Goeiemiddag. Ek is……..

In die bulletin:

# Die MK-party dien ‘n dringende aansoek by die Konstitusionele Hof in om die eerste Parlementsitting uit te stel
# Oekraïne hoop op ‘n geslaagde vredesberaad in Switserland
# En baie Suid-Afrikaanse mans verkies soggens ‘n koppie rooibostee

# Die MK-party het ‘n dringende aansoek by die Konstitusionele Hof ingedien om Vrydag se eerste sitting van die Parlement te verhoed. Die party sê daar is onopgeloste ongerymdhede tydens die verkiesing en hy wil die uitslae uitdaag. Hulle voer aan sonder hulle 58 lede sal daar nie ‘n kworum teenwoordig wees nie. Die sekretaris van die Parlement, Xolile George, sê egter 134 lede is nodig vir ‘n kworum. Hoofregter Raymond Zuma sal na verwagting die voorsitter wees met die verkiesing van die president en die speaker van die Nasionale Vergadering.

Intussen sê die Suid-Afrikaanse Kamer van Koophandel en Nywerheid daar is ‘n beduidende daling in sakevertroue weens die politieke onsekerheid na die verkiesing. Die Sakevertroue-indeks het in April met 5,8-punte tot 108,9-punte teruggesak en in Mei tot 107,8. Die kamer se ekonoom, Richard Downing, sê dalings in die korttermyn is beïnvloed deur ‘n daling in buitelandse toeriste en die volumes in handelsware-invoere, met ‘n geringe styging in die verkope van nuwe voertuie:

# Oekraïne se ambassadeur in Suid-Afrika, Liubov Abravitova, hoop die Oekraïnse vredesberaad in Switserland sal ‘n positiewe uitslag oplewer. Suid-Afrika is onder 90 lande en internasionale organisasies wat na verwagting die naweek die beraad gaan bywoon. Rusland het vroeër ‘n gebrek aan belangstelling getoon en dis onseker of die land sal deelneem. Abravitova beklemtoon die byeenkoms se belangrikheid vir internasionale bestendigheid en volhoubare ontwikkeling. Sy het bevestig die beraad wil ‘n plan beding om die oorlog te beëindig wat byna 28-maande gelede uitgebreek het.

# Rugby: Die Bulle is die laaste oorblywende plaaslike span in vanjaar se Verenigde Rugbykampioenskap en is Saterdag op Loftus gasheer vir die Ierse reus, Leinster, wat deur baie as die gunsteling beskou word. Die span is propvol internasionale sterre met meer toetservaring as die Bulle se VRK-wedstrydervaring. Hulle is ook desperaat om weer silwerware in te palm nadat hulle drie agtereenvolgende eindstryde in die Kampioenebeker verloor het. Leinster se hoofafrigter, Leo Cullen, sê hulle is opgewonde oor die uitdaging:

# Die finansiële aanwysers: Die rand verhandel teen 18-rand-70-sent teen die dollar, 20-rand-9-sent teen die euro en 23-rand-82-sent teen die pond. Bitcoin verhandel teen 67-duisend-192-dollar-4-sent. Die prys van goud is twee-duisend-306-dollar-4-sent per fynons en die prys van Brent-ruolie 81-dollar-41-sent per vat.

# Ten slotte: Rooibos Suid-Afrika se navorser, Gerald Maarman, sê ‘n nasionale opname wat tydens Mansgesondheidsmaand vrygestel is, toon Suid-Afrikaanse mans se interessante voorkeure. Meer as 700 mans het aan die opname deelgeneem, wat gekyk het na die soort drankies wat mans in verskillende omgewings, beroepe en ouderdomsgroepe verkies. Die opname het bevind 46-persent van mans begin hul dag met ‘n koppie koffie, terwyl 30-persent rooibostee verkies. Maarman sê dit is bemoedigend om te sien so baie mans verkies rooibos om hul dag te begin.

Bly ingeskakel vir meer nuus……………….