Nuus 14:00

BULLETIN 22 Oktober 2 nm

Goeiemiddag. Ek is……..

In die bulletin:

# ‘n Onderwyser van Soweto beskuldig van die verkragting van ‘n negejarige gee homself oor aan polisie
# ‘n Groot kuberveiligheidsbedreiging laat regerings en ondernemings skarrel om hul webwerwe te beskerm
# En tennis: Deelnemers aan die WTA-eindtoernooi is bevestig ná Muchova die laaste plek inpalm

# ‘n Onderwyser wat beskuldig word van die verkragting van ‘n negejarige leerder van die Busisiwe Primary School in Zola, Soweto, het homself aan die polisie oorgegee. Die Gautengse polisie het bevestig hy sal aangekla word van verkragting. Die onderwyser is gister voorlopig geskors nadat die bewerings gelei het tot betogings deur ouers en inwoners. Die LUR vir Onderwys, Lebogang Maile, het die skool besoek en gesê die kind en haar gesin het toegang tot sielkundige ondersteuning. Maile beklemtoon die bewerings is nog nie in ‘n hof getoets nie.

Action Society waarsku intussen die toewysings in die mini-begroting gaan nie veel beteken nie tensy die regering ‘n inwerkingstellingsplan met ‘n duidelike begroting rondom die stryd teen geslagsgeweld en vrouemoord bewerkstellig. Woordvoerder Juanita du Preez sê hoewel 186-miljoen-rand bewillig is vir forensiese en ander ondersoeke, is daar geen verduideliking oor hoeveel van dié geld spesialis-polisie-eenhede en forensiese laboratoriums sal bereik nie:

# President Cyril Ramaphosa vra dringende stappe om struikelblokke uit die weg te ruim wat bydra tot jeugwerkloosheid. Hy het op ‘n konferensie oor jeugindiensneming in Sandton, Johannesburg, gesê baie jongmense bly werkloos al is hul studies voltooi. Ramaphosa het ook die uitdagings beklemtoon waarmee jong entrepreneurs te kampe het, insluitend ‘n gebrek aan befondsing en netwerkgeleenthede. Hy sê die regering en belanghebbendes moet saamwerk om meer werksgeleenthede vir die jeug te skep:

Nuus uit die buiteland:

# Regerings en sommige van die wêreld se grootste maatskappye haas hulle om hul stelsels te beskerm na ‘n ernstige kuberveiligheidsbedreiging. Die kern van die bedreiging is kwesbaarhede wat verband hou met ‘n programmeertaal genaamd PHP, wat deur miljoene webwerwe gebruik word. Die FBI en die Amerikaanse Nasionale Veiligheidsagentskap het gewaarsku dat kuberkrakers die sekerheids-leemtes kan uitbuit om beheer oor webwerwe oor te neem en moontlik sensitiewe inligting in gevaar te stel. Regeringswebwerwe in Amerika, Brittanje, Finland en Nederland is geraak, asook maatskappye soos Amazon en Wikipedia.

# Tennis: Die deelnemers aan volgende maand se WTA-eindtoernooi in Indian Wells, Amerika, is bevestig toe die Tsjeg Karolina Muchova die agste en laaste plek ingepalm het. Sy het dit vermag toe Marta Kustyuk van Oekraïne moes onttrek tydens die tweede ronde van die Ningbo-ope in China. Muchova sluit aan by Elena Rybakina van Kazakstan, Aryna Sabalenka van Belarus, die Rus Mirra Andreeva, nog ‘n Tsjeg, Linda Noskova, die Amerikaners Coco Gauff en Jessica Pegula, en Elina Svitolina van Oekraïne. Die toernooi begin op 7 November.

# En die finansiële aanwysers: Die rand verhandel teen 16-rand-49-sent teen die dollar, 18-rand-50-sent teen die euro en 22-rand-7-sent teen die pond. Bitcoin verhandel teen 81-duisend-960-dollar. Die prys van goud is vier-duisend-en-85-dollar-70-sent per fynons en die prys van Brent-ruolie is 113-dollar-16-sent per vat.

Bly ingeskakel vir meer nuus……………….