Nuus 14:00

BULLETIN 22 Augustus 2 nm

Goeiemiddag. Ek is……..

In die bulletin:

# Minister Creecy kondig 11 nuwe vragspoor-operateurs aan vir Transnet se netwerkgleuwe
# Minister McKenzie verwerp die Menseregtekommissie se bevindings oor haatspraak
# En rugby: WP se afrigter maak groot veranderings vir die Curriebekerwedstryd teen die Haaie

# Die minister van Vervoer, Barbara Creecy, het aangekondig elf nuwe vragspoor-operateurs is goedgekeur om aan te sluit by Transnet se netwerk. Die operateurs sal treine oor ses belangrike deurgange bedryf, met 41 roetes wat gedek word. Hulle sal na verwagting vanaf volgende jaar jaarliks ​​’n bykomende 20-miljoen-ton goedere vervoer. Creecy het op ‘n nuuskonferensie gesê hierdie groot spoorweg-hervorming sal die sektor oopstel vir privaat belegging, doeltreffendheid verbeter en werksgeleenthede skep:

# Die leier van die Patriotic Alliansie en minister van Sport, Kuns en Kultuur, Gayton McKenzie, verwerp die Suid-Afrikaanse Menseregtekommissie se bevindings van prima facie haatspraak teen hom oor plasings uit die verlede op sosiale media. McKenzie noem dit lasterlik en polities-gemotiveerd en beweer hy het nooit amptelike korrespondensie ontvang nie en is op ‘n onregverdige wyse vooraf veroordeel. Hy sê dit is ‘n veldtog om sy naam te skend voor moontlike toekomstige ambisies:

Die DA vra die PA intussen om onmiddellik streng op te tree teen sy jeugleier in Kaapstad, wat strafregtelik ondersoek word vir ‘n poging om ‘n tienermeisie in Bonteheuwel tot seks uit te lok. Die DA-lid, Angus Mckenzie, sê hierdie saak is tans die onderwerp van ‘n polisie-ondersoek, en die volle mag van die wet moet toegepas word:

# Rugby: Westelike Provinsie se afrigter, Labeeb Levy, het ses veranderings aan sy opdrafspan aangebring vir vanaand se Curriebeker-wedstryd teen die Haaie in Durban. Paul de Villiers maak sy eerste verskyning van die seisoen op oopkantflank en die ervare Cabous Eloff is die loskopstut. Die skrumskakel Ezekiel Ngobeni vorm die skakelpaar saam met die Junior Springbok-losskakel Kyle Smith. Die ander twee veranderings in die agterlyn is Luke Burger en Jared Africa wat as vleuels opkom.

# Die finansiële aanwysers: Die rand verhandel teen 17-rand-63-sent teen die dollar, 20-rand-45-sent teen die euro en 23-rand-65-sent teen die pond. Bitcoin verhandel teen 112-duisend-570-dollar. Die prys van goud is drie-duisend-330-dollar-97-sent per fynons en die prys van Brent-ruolie is 67-dollar-1-sent per vat.

# En ten slotte: Standard Bank se data toon dat vroue toenemend huise en voertuie koop terwyl hulle sterker kredietprofiele as mans handhaaf. Ondanks hiervan gebruik mans die bank se funksie vir krediettellings meer gereeld. Shené Mothilal van Standard Bank sê vroue se laer kredietsaldo’s dra by tot hul hoër tellings. Slegs 42-persent van gebruikers van hierdie funksie is egter vroue. Die bank moedig vroue aan om die voordeel te benut vir beter rentekoerse en finansiële geleenthede.

Bly ingeskakel vir meer nuus……………….