Nuus 14:00

BULLETIN NUUSAGENTSKAP 9 Desember 2 nm

Goeiemiddag. Ek is……..

In die bulletin:

# Minister Ronald Lamola sê Suid-Afrika se G20-presidentskap sal globale uitdagings met ubuntu-gees aanpak
# Verbruikers se kragskuld aan munisipaliteite bereik 347-miljard-rand
# En, krieket: Die Proteas is nou boaan die Wêreldtoetskampioenskap na hul reeksoorwinning oor Sri Lanka

# Die minister van Internasionale Betrekkinge en Samewerking, Ronald Lamola, sê Suid-Afrika se G20-presidentskap sal globale uitdagings aanpak met ‘n fokus op die ubuntu-gees van gedeelde menslikheid. Lamola het tydens die eerste G20 Sherpas-vergadering in Sandton, Johannesburg, voorkeure uiteengesit, soos inklusiewe ekonomiese groei, voedselsekerheid, weerbaarheid teen rampe en die bestuur van kunsmatige intelligensie. Lamola het aan die media gesê Suid-Afrika sal ook taakspanne oor volhoubaarheid van skuld, energie-oorgange en kritieke minerale bekend stel:

# Die minister van Elektrisiteit en Energie, Kgosientsho Ramokgopa, sê Suid-Afrikaners se elektrisiteitskuld aan munisipaliteite beloop 347,6-miljard-rand en op hul beurt, skuld munisipaliteite Eskom meer as 90-miljard-rand. Hy gee verouderde rekeningstelsels, ondoeltreffendheid en maatskaplik-ekonomiese uitdagings die skuld vir die krisis. Ramokgopa sê swakhede in bestuur, insluitend wanbestuur en korrupsie, vererger die kwessie. Hy gryp by verskeie munisipaliteite in om die skuld uit te wis.

Die vakbond Giwusa vra intussen landwye betogings teen Eskom se aansoek vir tariefverhogings by die Nasionale Energiereguleerder. Die kragverskaffer wil ‘n verhoging van 36,15-persent hê net vir die 2025/26-boekjaar. Giwusa se woordvoerder, Koketso Phasha, sê Eskom se tariewe is reeds buitensporig sedert die aanvaarding van die groei-, indiensneming- en herverdelingstrategie in 1996:

# Krieket: Suid-Afrika het met 2-0 skoonskip gemaak in die toetsreeks teen Sri Lanka toe hulle die besoekers in Gqeberha met 109 lopies geklop het. Sri Lanka het hulle tweede beurt op die laaste oggend op 205 vir vyf hervat en moes ‘n wenteiken van 348 haal. Hulle laaste vyf paaltjies het egter kort na mekaar gekantel en al die kolwers was terug in die pawiljoen vir 238. Draaibouler Keshav Maharaj het vyf paaltjies geneem. Die Proteas is danksy hierdie oorwinning nou boaan die punteleer van die Wêreldtoetskampioenskap.

# Die finansiële aanwysers: Die rand verhandel teen 17-rand-85-sent teen die dollar, 18-rand-89-sent teen die euro en 22-rand-81-sent teen die pond. Bitcoin verhandel teen 98-duisend-446-dollar. Die prys van goud is twee-duisend-657-dollar-62-sent per fynons en die prys van Brent-ruolie 71-dollar-68-sent per vat.

# Ten slotte: Die Suid-Afrikaanse Entstofvervaardigers, wat deel is van die Nasionale Gesondheidslaboratoriumdiens, ondervind vertragings met die produksie van slangbyt-teengif weens opgradering wat voorrade laat leegloop het. Woordvoerder Mzi Gcukumana sê die diens het begin met ‘n opknappingsprojek om teengifvervaardiging doeltreffend te verbeter. Hy sê dit sal aandag gee aan vorige kommer oor masjinerie wat breek, meestal weens verouderde toerusting en onvoldoende infrastruktuur:

Bly ingeskakel vir meer nuus……………….