Nuus 14:00

BULLETIN NUUSAGENTSKAP 2 Desember 2 nm

Goeiemiddag. Ek is……..

In die bulletin:

# Meer as ses-miljoen mense sal na verwagting hierdie feestyd die grense oorsteek
# Vrese dat meer as 50 mense dood is in ‘n stormloop op ‘n sokkerstadion in Guinee
# En, krieket: Don Bradman se Baggy Green sal na verwagting môre vir sowat 4,7-miljoen-rand opgeveil word

# Die Grensbestuursowerheid verwag meer as ses-miljoen mense sal hierdie feestyd die land se grense oorsteek. Kommissaris Michael Masiapato verwys na planne om oorgrens-misdaad en onwettige immigrasie te bekamp, en waarsku ook oor geslagsgeweld op grensposte. Die owerheid, in samewerking met Maatskaplike Ontwikkeling, sal kwesbare vroue en kinders beskerm. Masiapato sê Binnelandse Sake het ook hulle kantoorure by bepaalde grensposte verleng om opeenhoping te voorkom:

# ‘n Parlementslid van die MK-party, Mzwanele Manyi, het die EFF-leier Julius Malema se dreigement afgemaak oor regstappe om oudpresident Jacob Zuma se Nkandla-kompleks in beslag te neem oor onbetaalde regsfooie. Die geskil volg op spanning tussen die EFF en MK oor versekeie voormalige EFF-lede wat by MK aangesluit het. Manyi voer aan Zuma se eiendom is onder beskerming van die Ingonyama-trust en daar kan nie daarop beslag gelê word nie:

# Die DA het onthul dat diensverskaffers wat Gesondheidsdepartmente help bedrieglike regsgeneeskundige eise ingedien het. Dit sluit in 51 vals eise van meer as tien-miljard-rand in die Oos- en die Noord-Kaap en in KwaZulu-Natal. Volgens Michele Clarke van die party het ‘n regsfirma na bewering 4,4-miljoen-rand verduister uit ‘n skikking van 9,3-miljoen-rand met Sfundo Hlongwane, wat met serebrale gestremdheid leef. Sy sê met 108-miljard-rand se regsgeneeskundige verpligtinge, vra die DA strenger oorsig om slagoffers en staatsgesondheidsorgfondse te beskerm.

# Daar word gevrees dat meer as 50 mense dood is ná botsings tussen ondersteuners en ‘n stormloop by ‘n sokkerwedstryd in suidoos-Guinee. Die wedstryd tussen Labe en Nzerekore was die eindstryd van ‘n toernooi ter ere van die Wes-Afrikaland se militêre leier, Mamady Doumbouya. ‘n Plaaslike regeringsamptenaar het aan Reuters gesê geweld het uitgebreek oor ‘n betwiste doel. Video’s wat aanlyn gedeel is, wys verskeie kinders tussen die mense op die grond, en beelde toon ook hoe ondersteuners oor mure skarrel.

# Krieket: ’n Australiese toetspet wat die legendariese kolwer, Don Bradman, gedra het, sal na verwagting 4,7-miljoen-rand haal wanneer dit môre in Sydney onder die hamer kom. Bradman het die gehawende Baggy Green gedra tydens Indië se toer in Australië in 1947/’48 toe hy 715 lopies teen ‘n gemiddeld van 178,75 aangeteken het, insluitend drie honderdtalle en ʼn dubbele honderdtal. Bradman het in 1948 uitgetree met ʼn wêreldrekord toetsgemiddeld van 99,94. Die gesaghebbende publikasie, Wisden, beskou hom as die beste van alle tye.

# En die finansiële aanwysers: Die rand verhandel teen 18-rand-14-sent teen die dollar, 19-rand-6-sent teen die euro en 23-rand-5-sent teen die pond. Bitcoin verhandel teen 95-duisend-154-dollar. Die prys van goud is twee-duisend-636-dollar-81-sent per fynons en die prys van Brent-ruolie 72-dollar-48-sent per vat.

Bly ingeskakel vir meer nuus……………….