Nuus 14:00

BULLETIN NUUSAGENTSKAP 29 November 2 nm

Goeiemiddag. Ek is……..

In die bulletin:

# Die GOOD-party beskuldig die DA dat hy die regering ondermyn deur met AfriForum en Solidariteit oor die BELA-wet saam te staan
# City Power doen die omskakeling van 35-duisend kragmeters na die spertyd 
# En rugby: Die Blitsbokke is gereed vir die Dubaise Sewes-uitdaging

# Die GOOD-party sê die DA ondermyn die regering van nasionale eenheid deur hom by AfriForum en die vakbond, Solidariteit, te skaar oor die Wysigingswet op Basiese Onderwyswette. Die party beweer die minister van Basiese Onderwys, Siviwe Gwarube, se regstreekse beroep op president Cyril Ramaphosa ondermyn die veelparty-geskilbeslegtingsmeganisme onder leiding van adjunkpresident Paul Mashatile. GOOD se sekretaris-generaal, Brett Herron, waarsku veranderings aan die taalbeleid van die BELA-wet kan bestaande ongelykhede verdiep en sleutelgesprekke van die koalisie verswak.

# Die metaalwerkersvakbond Numsa SA het sy staking by ArcelorMittal Suid-Afrika beëindig, wat op 14 November begin het. Die ooreenkoms sluit in vrywillige skeidingspakkette, die versagting van afleggings en opleidingsondersteuning. Albei partye moedig regeringsgeleide gesprekke aan om aandag te gee aan bedryfsuitdagings soos hoë tariewe en onbillike handelspraktyke, wat die volhoubaarheid in die staalsektor bedreig. Numsa se woordvoerder, Phakamile Hlubi-Majola, waarsku oor wydlopende gevare vir vervaardiging en werksekerheid:

# City Power in Johannesburg het meer as 35-duisend nulkoop kragmeters omgeskakel, enkele dae ná die sperdatum. Die woordvoerder, Isaac Mangena, sê ondanks uitdagings, soos opsetlike beskadilging en die omseiling van meters, is sleutel-koepons vooraf geskep om kliënte wat geraak is, te help. Mangena sê ‘n boete-kwytskelding, wat verleng is tot Saterdag, het kliënte aangemoedig om te registreer vir nuwe meters sonder om ‘n boete te betaal. Hy sê ook spanne gee aktief aandag aan navrae en ondersteun registrasies in gebiede wat geraak word.

# Iran gaan vandag in Genéve met Brittanje, Frankryk en Duitsland samesprekings voer oor sy kernkragprogram, minder as twee maande voor Donald Trump sy terugkeer as Amerikaanse president maak. Die vergadering is agter geslote deure, met die lande se ministeries van Buitelandse Sake wat baie min besonderhede oor die gesprek bekend gemaak het. Die Iranse diplomaat Majid Takht-Ravanchi, politieke adjunk van die minister van Buitelandse Sake, Abbas Aragchi, verteenwoordig die land in die samesprekings wat volg op ‘n vergadering in New York in September.

# Rugby: Die Blitsbokke is slaggereed vir die begin van die nuwe sewesseisoen hierdie naweek in Dubai. Hoofafrigter Philip Snyman sê sy groep is goed voorberei met die fokus op sterk verdediging en om besit om te keer. Suid-Afrika speel teen Australië, Kenia en Frankryk in Groep A. Volgens Snyman wil hulle voortbou op die bronsmedalje op die Olimpiese Spele in Parys:

# En die finansiële aanwysers: Die rand verhandel teen 18-rand-6-sent teen die dollar, 19-rand-8-sent teen die euro en 22-rand-92-sent teen die pond. Bitcoin verhandel teen 96-duisend-588-dollar. Die prys van goud is twee-duisend-662-dollar-40-sent per fynons en die prys van Brent-ruolie 72-dollar-8-sent per vat.

Bly ingeskakel vir meer nuus……………….