Nuus 14:00
BULLETIN NUUSAGENTSKAP 28 November 2 nm
Goeiemiddag. Ek is……..
In die bulletin:
# Die Reserwebank gaan ‘n belang van 50-persent in BankservAfrica bekom
# Oekraïne kritiseer Rusland se jongste lugaanval op sy energie-infrastruktuur
# En, krieket: Die Proteas word uitgeboul vir 191 op die tweede oggend in Durban
# Die Reserwebank beplan om ‘n belang van 50-persent in die grootste betalingsverrekeningshuis in die land, BankservAfrica, te bekom om digitale betaalstelsels te verbeter. Gesprekke duur voort met die eienaars van BankservAfrica. Die sentrale bank wil finansiële insluiting deur digitalisering verbeter, wat volgens hom maatskaplike ontwikkeling sal ondersteun. Pradeep Maharaj van die Reserwebank het aan SABC News gesê die belegging is daarop gemik om Suid-Afrika se betalingsinfrastruktuur te moderniseer:
# Die onderwysaktivis, Hendrick Makaneta, het die minister van Basiese Onderwys, Siviwe Gwarube, gevra om te verduidelik of daar toestemming van die ouer of voog vereis word voor die matriekuitslae gepubliseer word, kragtens die Wet op die Beskerming van Persoonlike Inligting. Die Departement van Basiese Onderwys beplan om uitslae bekend te maak met die gebruik van eksamennommers om leerders se privaatheid te beskerm. Makaneta stel egter voor toestemmingsvorms moet uitgereik word om deursigtigheid en regsnakoming te verseker:
# Die Parlement se portefeuljekomitee vir Landbou het die Onderstepoort Biologiese Produkteraad ontbied om sy foutiewe verslagdoening oor die begroting vir die entstofgerief-opknappingsprojek op te klaar. Ten spyte van die ontvangs van 492-miljoen-rand in 2012/13, beraam die instelling daar is ‘n bykomende 381-miljoen-rand nodig, met ‘n verwysing na verouderde syfers. Die komitee het ook kommer uitgespreek oor swak gevolgbestuur nadat aanklagte van finansiële wangedrag tot sleutelbedankings gelei het. Vorderingsverslae is van die departement aangevra om interne beheermislukkings en ouditbevindings te kan opklaar.
# Rusland het in sy jongste lugaanval op Oekraïne oornag 188 projektiele op energie-infrastruktuur afgevuur en volgens Kiëf het hy 79 missiele en 35 hommeltuie afgeskiet. Die Lugmag sê in ‘n verklaring 62 hommeltuie het van sy radar verdwyn of is versper deur elektroniese verdedigingstelsels. President Volodimyr Zelensky sê Rusland het ‘n groot aantal trosbomme op Oekraïnse energie-aanlegte afgevuur en beskryf dit as ʼn veragtelike eskalering deur Moskou.
# Krieket: Suid-Afrika se terugvegpoging het op 191 geëindig op die tweede oggend van die eerste toets teen Sri Lanka in Durban. Die gashere was in die moeilikheid op 80 vir vier toe reën spel gister teen etenstyd onderbreek het. Kaptein Temba Bavuma het vandag die aanslag gelei en 70 lopies aangeteken. Hy is goed bygestaan deur Keshav Maharaj met 24 terwyl Kagiso Rabada flink 15 lopies geslaan het. Asitha Fernando en Lahiru Kumara het elkeen drie paaltjies laat kantel en Vishwa Fernando en Prabath Jayasuriya elk twee.
# En die finansiële aanwysers: Die rand verhandel teen 18-rand-18-sent teen die dollar, 19-rand-16-sent teen die euro en 23-rand-1-sent teen die pond. Bitcoin verhandel teen 94-duisend-922-dollar. Die prys van goud is twee-duisend-645-dollar-65-sent per fynons en die prys van Brent-ruolie 72-dollar-75-sent per vat.
Bly ingeskakel vir meer nuus……………….