Nuus 14:00

BULLETIN NUUSAGENTSKAP 22 November 2 nm

Goeiemiddag. Ek is……..

In die bulletin:

# ‘n Varkboer se borgtogaansoek word uitgestel tot Februarie na ‘n grusame dubbele moord in Limpopo
# Kaapstad bied ‘n beloning van 100-duisend-rand aan na die moord op ‘n  tiener in Elsiesrivier
# En, motorsport: Lewis Hamilton gee die pas aan in Las Vegas voor Lando Norris en Max Verstappen

# Die borgtogaansoek van ‘n boer van Limpopo wat daarvan beskuldig word dat hy twee vroue vermoor en hulle liggame aan varke gevoer het, is in die Landdroshof in Mankweng tot 18 Februarie uitgestel. Zachariah Olivier en twee ander mans is in Augustus in hegtenis geneem na die grusame ontdekking. Die hof is vanoggend meegedeel Olivier se regsverteenwoordiger is nie beskikbaar nie. Die twee ander beskuldigdes, die plaastoesighouer Adriaan de Wet en die werker William Musora, het vroeër hulle borgtogaansoeke laat vaar.

# Die Stad Kaapstad bied ʼn beloning van tot 100-duisend-rand aan vir inligting wat sal lei tot die inhegtenisneming en vervolging van diegene wat verantwoordelik was vir die moord op ʼn 14-jarige seun in Elsiesrivier. Grantham van Reenen is noodlottig gewond toe vermeende bendelede losgebrand het toe hy en twee vriende op pad was skool toe. Die burgemeesterskomiteelid vir Veiligheid en Sekerheid, JP Smith, sê Grantham was nie betrokke by bendes nie:

# Die GOOD-party sê ‘n weldeurdagte en volhoubare reaksieplan op voedseloordraagbare siektes is nodig en nie ‘n halsoorkop reaksie soos die registrasie van spazawinkels binne 21 dae nie. Meer as 800 voedselvergiftigingsgevalle is oral in die land aangemeld met minstens 23 sterfgevalle. GOOD se sekretaris-generaal, Brett Herron, sê hoewel die regering se bedoeling goed is, het dit ‘n hele miernes oopgekrap:

# Die Britse minister van Binnelandse Sake, Yvette Cooper, sê die Weste moet aanhoudend aggressiewe taal verwag van die Russiese president, Vladimir Putin. Sy het aan Sky News gesê die Weste moet teen Putin opstaan. Brittanje en Amerika het Oekraïne dié week toestemming gegee om hul langafstand-wapens op Rusland te mik, wat woede en dreigemente vanaf die Kremlin ontketen het. Putin sê hy kan aanvalle op militêre geriewe uitvoer in lande wat Kiëf toelaat om hulle wapens teen Rusland te gebruik. Die oorlog sal vererger indien Britse of Amerikaanse militêre geriewe aangeval word.

# Motorsport: Lewis Hamilton het die beste tyd aangeteken voor Lando Norris terwyl die driemalige kampioen, Max Verstappen, gesukkel het om aan die gang te kom in die laataand ope oefening vir die naweek se Grand Prix in Las Vegas. Norris wil graag sy skrale aanslag op die titel lewend hou, met Verstappen, wat sy vierde agtereenvolgende wêreldtitel vir bestuurders wil inpalm, wat min indruk gemaak het in ʼn koue en wisselvallige oefening. Hy was meer as twee sekondes stadiger as die beste tyd. Verstappen is 62 punte voor Norris met drie Grands Prix wat oorbly.

# En die finansiële aanwysers: Die rand verhandel teen 18-rand-7-sent teen die dollar, 18-rand-79-sent teen die euro en 22-rand-58-sent teen die pond. Bitcoin verhandel teen 98-duisend-657-dollar. Die prys van goud is twee-duisend-708-dollar-17-sent per fynons en die prys van Brent-ruolie 74-dollar-13-sent per vat.

Bly ingeskakel vir meer nuus……………….