Nuus 14:00

BULLETIN NUUSAGENTSKAP 21 November 2 nm

Goeiemiddag. Ek is……..

In die bulletin:

# Voedseloordraagbare siektes word tot ‘n nasionale ramp verklaar
# Kenners verwelkom wysigings aan Suid-Afrika se geskiedenisleerplan
# En, rugby: Die statistiek is ten gunste van die Bokke Saterdag teen Wallis

# Die Nasionale Rampbestuursentrum het ‘n nasionale ramp verklaar weens ‘n toename in voedseloordraagbare siektes as gevolg van swak voedselveiligheid. Minstens 890 gevalle van voedseloordraagbare siektes is hoofsaaklik in Gauteng en KwaZulu-Natal aangemeld en in die lig hiervan word ‘n  multisektorale noodlenigingsplan voorgestel. Die minister van Gesondheid, Aaron Motsoaledi, het op ‘n nuuskonferensie gesê die regering werk aan ‘n plan om die krisis aan te pak en voedselveiligheid landwyd te verbeter:

Die minister van Justisie en Grondwetlike Ontwikkeling, Thembi Simelane, sê intussen wetstoepassingsagentskappe sal swaar toeslaan op spazawinkelregistrasie-afpersers wat die proses wil gebruik om hulself te verryk. Simelane het op ‘n nuuskonferensie gepraat oor die aksieplan om voedseloordraagbare siektes te bestuur. Sy sê die regering doen ‘n beroep op alle Suid-Afrikaners om nie winkeleienaars se registrasieproses te verhinder nie:

# Die minister van Indiensneming en Arbeid, Nomakhosazana Meth, het aangekondig die Werkloosheidsversekeringsfonds het 2,9-miljard-rand in uitstaande eise uitbetaal tydens die eerste helfte van die boekjaar. Sy het die Parlement toegespreek en die vinnige verwerking van 99-persent van die goedgekeurde eise binne tien werksdae uitgelig. Meth het die portefeuljekomitee verseker van voortgesette pogings om die Ouditeur-Generaal se bekommernisse op te los, interne beheermaatreëls te verbeter en aanlyn stelsels bestendig te kry. Sy sê hierdie prestasie dui aansienlike vordering aan met die aandag wat gegee word aan kwalifiserende begunstigdes se agterstallige eise.

# Kenners verwelkom wysigings aan Suid-Afrika se geskiedenisleerplan, met onder meer voorkoloniale geskiedenis vir graad 10 tot 12 wat bygevoeg word. Die doel is om weg te beweeg van ‘n Eurosentriese oogpunt en meer op Afrika-geskiedenis te fokus. News24 berig geskiedkundiges glo dis belangrik om die stem van inheemse mense soos die San, Khoi en Xhosa, asook die gevolge van kolonialisme en apartheid in te sluit. Die veranderinge het ten doel om leerders te help om krities te dink, hulle erfenis te verstaan en ingeligte wêreldburgers te word.

# Rugby: Die statistiek is ten gunste van die Springbokke wanneer hulle Saterdag in Cardiff teen Wallis te staan kom. Die twee spanne het al 42 keer teen mekaar gespeel en Suid-Afrika het 34 keer gewen en Wallis sewe keer, terwyl een wedstryd gelykop was. Die Bokke se grootste oorwinning oor die Walliesers was in 1998 in Suid-Afrika toe hulle 96-13 gewen het – Wallis se grootste nederlaag ooit. ‘n Oorwinning vir die wêreldkampioen op die Principality-stadion sal hulle hul eerste onoorwonne toer in die noordelike halfrond sedert 2013 besorg.

# En die finansiële aanwysers: Die rand verhandel teen 18-rand-14-sent teen die dollar, 19-rand-7-sent teen die euro en 22-rand-90-sent teen die pond. Bitcoin verhandel teen 97-duisend-403-dollar. Die prys van goud is twee-duisend-668-dollar-45-sent per fynons en die prys van Brent-ruolie 73-dollar-43-sent per vat.

Bly ingeskakel vir meer nuus……………….