Nuus 14:00
BULLETIN NUUSAGENTSKAP 4 September 2 nm
Goeiemiddag. Ek is……..
In die bulletin:
# Cosatu sê dit lyk asof die gety begin draai teen korrupsie
# BOSA vra ‘n oorlogsverklaring teen misdaad te midde van polisie-ondoeltreffendheid
# En, Paralimpiese Spele: Pieter du Preez wen brons in Parys
# Cosatu sê hy is ingenome dat dit lyk asof die gety besig is om te draai teen korrupsie onder die leierskap van president Cyril Ramaphosa. Dit volg nadat die Passassier-spoorvereniging van Suid-Afrika se voormalige hoof-ingenieur, Danile Mthimkhulu, gister tot 15-jaar tronkstraf gevonnis is vir die vervalsing van sy kwalifikasies en ander dokumente. Cosatu se woordvoerder, Zanele Sabela, sê Mthimkhulu se betrokkenheid het Prasa se projekte aan aansienlike risiko’s blootgestel, asook aan regsaanspreeklikheid:
# Build One South Africa eis ‘n oorlogsverklaring teen misdaad en wys op die ondoeltreffendheid van die polisie om stygende misdaaad-bedrywighede hok te slaan. Volgens die party is 500 moorde per week en slegs 22-duisend speurders landwyd te veel vir die polisie om te hanteer. BOSA se leier, Mmusi Maimane, het tydens ʼn parlementêre debat gevra vir onmiddellike optrede om polisiestasies te heromskep as plekke van hoop, die samewerking van die gemeenskap te bevorder, en veiligheid en orde te herstel:
# Die minister van Gesondheid, Aaron Motsoaledi, moedig aptekers aan om ‘n aktiewe rol te speel in die vervaardiging van entmiddels te midde van toenemende aansteeklike siektes. Motsoaledi het gepraat op die Aptekers Internasionaal-federasie se kongres in Kaapstad en die dringende behoefte beklemtoon aan bekostigbare entmiddels en geneesmiddels terwyl hy die opgaring tydens Covid-19 veroordeel. Hy lig die toekomstige uitdagings van nie-oordraagbare siektes uit en vra aptekers om voorstanders te wees van ‘n billike gesondsheidsbeleid en ‘n meer inklusiewe gesondheidsorgstelsel.
Die Wêreld-gesondheidsorganisasie sê intussen net meer as 161-duisend kinders onder die ouderdom van tien is sedert Sondag in Gaza teen polio ingeënt. Israel en Hamas het ooreengekom op ‘n reeks opskortings van gevegte om gesondheidsorgwerkers toe te laat om die inentings te doen. Gaza se eerste bevestigde geval van polio in 25 jaar het verlede maand ‘n tien-maande-oue baba gedeeltelik verlam gelaat. Die mikpunt is om altesaam 640-duisend kinders in te ent. Die heruitbreking van polio word toegeskryf aan die ontwrigting van kinder-inentingsprogramme, asook enorme skade aan water en sanitasiestelsels.
# Paralimpiese Spele: Pieter du Preez het Suid-Afrika se derde medalje in Parys ingepalm, met brons in die H1 para-fietsry-kategorie. Hy het die individuele tydskof voltooi in 36-minute-7,05-sekondes, na Fabrizio Cornegliani van Italië en die Belg Maxime Hordies. Die H1-kategorie is vir atlete met ernstige bewegingsbeperkings. Du Preez spog met talle toekennings nadat hy in 2020 goud verower het op die Spele in Tokio, en talle wêreldkampioenskappe gewen het. Die Suid-Afrikaans-gebore Irmgard Bensusan, wat vir Duitsland deelneem, het silwer gewen in die T64-200-meter.
# En die finansiële aanwysers: Die rand verhandel teen 17-rand-91-sent teen die dollar, 19-rand-80-sent teen die euro en 23-rand-49-sent teen die pond. Bitcoin verhandel teen 56-duisend-536-dollar-99-sent. Die prys van goud is twee-duisend-482-dollar-89-sent per fynons en die prys van Brent-ruolie 73-dollar-30-sent per vat.
Bly ingeskakel vir meer nuus……………….