Nuus 13:00

BULLETIN 20 Junie 1 nm

Goeiemiddag. Ek is……..

In die bulletin:

# Adjunkminister Morolong sê klimaatsverandering en veranderende produksiepatrone hervorm ekonomieë wêreldwyd
# Die EFF verwelkom ‘n stap om die nuwe Wysigingswetsontwerp op Verkiesingsaangeleenthede in te stel
# En rugby: Die Bulle-afrigter Johan Ackerman erken Leinster was die kampioenspan in die VRK-eindstryd

# Adjunkminister in die Presidensie, Kenny Morolong, sê klimaatsverandering, tegnologiese vooruitgang, kunsmatige intelligensie, digitalisering en veranderende produksiepatrone hervorm ekonomieë regoor die wêreld. Hy sê hierdie ontwrigtings kan gevare meebring, maar dit skep ook nuwe nywerhede, nuwe vaardighede en nuwe vorme van werk. Morolong sê die groen ekonomie is een van die vinnigste groeiende sektore, aangevuur deur skoner energiestelsels, volhoubare produksie, klimaatbestande infrastruktuur asook herbenuttingsbenaderings tot afval en hulpbronne:

# Die EFF verwelkom die publikasie van ‘n kennisgewing om ‘n Wysigingswetsontwerp op Verkiesingsaangeleenthede in te dien, wat sy leier Julius Malema voorgestel het. Die woordvoerder Sinawo Thambo sê die doel is om Suid-Afrika se verkiesingsraamwerk aan te pas sodat kiesers outomaties geregistreer kan word. Hy sê die voorgestelde wet mik ook om struikelblokke wat deelname aan verkiesings beperk, uit die weg te ruim en die demokrasie te versterk deur te verseker alle stemgeregtigde burgers verskyn sonder onnodige administratiewe hindernisse op die kieserslys. Die EFF beplan om aan die speaker van die Nasionale Vergadering, Thoko Didiza, te skryf om te verseker die wetsontwerp word sonder versuim ingedien en verwerk.

# Die Gautengse regering het met diepe hartseer verneem van die afsterwe van die visekanselier en hoof van die Sefatho Makgatho Universiteit vir Gesondheidswetenskappe, professor Tandi Matsha-Erasmus. ‘n Regeringswoordvoerder, Sizwe Pamla, sê Matsha-Erasmus was ‘n vooraanstaande akademikus, bekwame navorser en visionêre leier wat haar lewe gewy het aan die bevordering van hoër onderwys, wetenskaplike navorsing en die ontwikkeling van toekomstige gesondheidsorgpersoneel:

‘n Treindrywer van East Midlands Railway is dood en 89 mense is beseer nadat twee passasiers­treine suid van Bedford in die VK gebots het. Die ongeluk het gisteraand plaasgevind op ‘n roete na London St Pancras. Die trein was onderweg vanaf Corby toe dit met ‘n Nottingham-trein gebots het. Drie-en-dertig passasiers het ernstige tot kritieke beserings opgedoen. Die Britse Vervoerpolisie en die Spoorwegongeluk-ondersoekafdeling stel ondersoek in na die voorval. Treindienste tussen Bedford en Londen bly die naweek opgeskort.

# Rugby: Die Bulle se afrigter Johan Ackerman het erken Leinster was die beter span in die eindstryd van die Verenigde Rugbykampioenskap in Dublin, nadat die Pretoria-span gisteraand met 36–7 verloor het. Leinster het deurgaans teen ‘n vinnige pas gespeel en met volgehoue druk reeds binne die eerste 27 minute drie drieë gedruk. Ackerman het bygevoeg Leinster het hulle vir elke fout gestraf. Die Bulls se dissipline was ook onder verdenking, met twee geelkaarte in die eerste helfte wat hul teenaanvalle ondermyn het:

# En ten slotte: Die Padongelukkefonds moedig jongmense aan om ‘n aktiewe rol te speel in die verbetering van padveiligheid gedurende Jeugmaand. Hy waarsku jongmense is steeds onder die kwesbaarste padgebruikers, wat meer as 50-persent van padsterftes verteenwoordig. Die fonds sê waaghalsige gedrag soos spoed en roekelose bestuur veroorsaak steeds ongelukke. Die Fonds gaan voort met die jeugbestuurderontwikkelingsprogram, wat werklose matrikulante oplei in professionele bestuursvaardighede en padveiligheid, met 760 deelnemers wat reeds ingeskryf is en meer wat bygevoeg sal word.

Bly ingeskakel vir meer nuus……………….