Nuus 13:00

BULLETIN 16 Julie 1 nm

Goeiemiddag. Ek is……..

In die bulletin:

# ‘n Ondersoeker verduidelik die Ondersoekdirektoraat se ondersoekproses aan die Madlanga-kommissie
# Amerikaanse soldate gaan verpligte testosteroon-toetse ondergaan
# En rugby: Die All Blacks se afrigter maak vier veranderings aan sy span vir die kragmeting met Ierland

# ‘n Offisier van die Ondersoekdirektoraat teen Korrupsie, Brian Padayachee, het voor die Madlanga-kommissie getuig korrupsiesake begin met voorlopige ondersoeke voor amptelike misdaad-dossiere geopen word. Ondersoekers beoordeel eers bewerings en indien geen bewyse gevind word nie, word sake afgesluit. Padayachee sê indien daar bewyse van ‘n misdaad is, versamel ondersoekers verdere bewyse voor hulle ‘n amptelike dossier registreer, dus kan beëdigde verklarings afgeneem word maande voor ‘n saak amptelik geregistreer word:

# Forum for South Africa sê die sluiting van 58 onwettige inlywingskole, die inhegtenisneming van 40 verdagtes en die indien van 116 strafregtelike klagtes dui daarop dat onwettige praktyke steeds jong Suid-Afrikaners se lewens bedreig. Die dodetal in vanjaar se winter-seisoen staan op 43. FOSA se leier, Tebogo Mashilompane, sê onwettige inwydingskole, ongekwalifiseerde tradisionele genesers en diegene wat kulturele praktyke uitbuit om geld te maak, moet aanspreeklik gehou word:

Nuus uit die buiteland:

# Die Amerikaanse minister van Verdediging, Pete Hegseth, sê alle soldate van 30 jaar en ouer se testosteroonvlakke sal jaarliks getoets word. Dit volg ná onlangse pogings deur president Donald Trump se administrasie om testosteroon-terapie toegankliker te maak. Soldate van jonger as 30 kan versoek om getoets te word. Hegseth sê die projek het ten doel om ‘n tekort aan testosteroon te identifiseer en te behandel, aangesien dit militêre gereedheid kan beïnvloed:

# Rugby: Die All Blacks se afrigter, Dave Rennie, het vier veranderinge aangebring aan die span wat Italië verlede week 47-17 verslaan het. Hulle pak Ierland Saterdag in ‘n Nasieskampioenskaps-wedstryd op Eden-park. Tupou Vaa’i skuif van slot na flank, en Josh Lord en Patrick Tuipulotu is die slotte. Die senter Quinn Tupaea vervang Billy Proctor in die beginspan en Josh Moorby skuif van die bank na vleuel in die opdrafspan in die plek van die beseerde Leroy Carter. Rennie sê hulle het ‘n sterk span gekies.

# Die finansiële aanwysers: Die rand verhandel teen 16-rand-33-sent teen die dollar, 18-rand-73-sent teen die euro en 22-rand-8-sent teen die pond. Bitcoin verhandel teen 64-duisend-53-dollar. Die prys van goud is vier-duisend-en-34-dollar-30-sent per fynons en die prys van Brent-ruolie is 83-dollar-41-sent per vat.

# En ten slotte: Die minister van Maatskaplike Ontwikkeling, Dina Pule, vra Suid-Afrikaners om die stilte oor geslagsgeweld en vrouemoord te verbreek en mishandeling aan te meld voor dit tot ‘n tragedie lei. Bykans die helfte van alle verkragtings wat in die vierde kwartaal van die vorige boekjaar aangemeld is, het in die huise van die slagoffer of die oortreder plaasgevind. Dit beklemtoon die voortdurende bedreiging van geslagsgeweld agter geslote deure. Pule sê geslagsgeweld en vrouemoord bly een van Suid-Afrika se dringendste maatskaplike uitdagings, ondanks grondwetlike beskerming en ‘n reeks regeringsmaatreëls.

Bly ingeskakel vir meer nuus……………….