Nuus 13:00

BULLETIN 22 November 1 nm

Goeiemiddag. Ek is……..

In die bulletin:

# Die G20-leiersberaad neem ‘n verklaring met oorweldigende konsensus aan
# President Ramaphosa sê die G20-leiers moet nie toelaat dat enigiets die beraad afwater nie
# En die DA striem die duur skorsings van regeringsamptenare

# President Cyril Ramaphosa het aangekondig dat Suid-Afrika ‘n konsensus bereik het om die G20-leiersberaadverklaring te aanvaar. Die inhoud van die verklaring bly vertroulik totdat dit gepubliseer word. Daar was twyfel of ‘n verklaring sonder die Verenigde State aangeneem kon word. Ramaphosa het gesê dat die lande wat die Leiersberaad bywoon, oorweldigend tot die verklaring ingestem het:

Ramaphosa sê ook die G20-leiersberaad het ‘n verantwoordelikheid om nie toe te laat dat die integriteit en geloofwaardigheid van die G20 verswak word nie. Hy het die openingsrede by die beraad gelewer, wat vandag by die Nasrec-eksposentrum in Johannesburg afgeskop het. Ramaphosa sê die beraadslagings van die G20 het ‘n uitwerking op die lewens van alle lede van die wêreldgemeenskap:

En die Britse premier, Keir Starmer, sê meer as 70-miljoen mense in 100 lande het voordeel getrek uit die Globale Fonds sedert die eerste beleggings in 2002. Starmer het tydens die agtste Globale Fondsaanvullingsberaad in Nasrec, Johannesburg, gesê die fonds se werk is een van die mensdom se grootste suksesverhale, wat sterftesyfers met byna twee derdes verminder het. Hy het gewaarsku dat malaria, MIV en TB dodelike bedreigings bly, maar het nasies aangespoor om wêreldgesondheid eerste te stel:

# Die DA sê langdurige skorsings van senior regeringsamptenare kos belastingbetalers miljoene en ontbloot mislukkings in interne arbeidsstelsels. Dit volg op die onthulling dat die WVF-kommissaris, Teboho Maruping, meer as ‘n jaar na sy skorsing steeds ten volle betaal word, sonder enige tugstappe. Die DA-LP Michael Bagraim sê die regering volg ‘n rampspoedige tendens om amptenare gereeld vir maande of jare te skors sonder om verhore af te sluit. Hy beklemtoon die staatsdiens is nie in staat om arbeidsverhoudinge doeltreffend te bestuur nie.

# Die polisie in Stellenbosch ondersoek ‘n moord nadat die adjunkhoof van Kayamandi Primary School gistermiddag op die skoolterrein doodgeskiet is. Die Wes-Kaapse polisiewoordvoerder, Wesley Twigg, sê geen arrestasies is gemaak nie en speurders probeer ‘n motief vasstel. Beamptes het die 54-jarige slagoffer met ‘n skietwond gevind, en hy is op die toneel dood verklaar. Twigg doen ‘n beroep op enigiemand met inligting om hul naaste polisiestasie te kontak of anoniem van die MySAPS-app gebruik te maak.

# En motorsport: Die voorloper in die bestuurderskampioenskap, Lando Norris, het die voorste wegspringplek in die Las Vegas Grand Prix in uitdagende nat toestande ingeneem. Dit is die McLaren-bestuurder se derde agtereenvolgende voorste wegspringplek. Die Brit het voor Red Bull se Max Verstappen, Williams se Carlos Sainz en George Russell in die Mercedes geëindig, terwyl sy titel-mededinger en spanmaat Oscar Piastri met die vyfde plek tevrede moes wees. Norris sê die toestande was baie moeilik om in te bestuur:

Bly ingeskakel vir meer nuus……………….