Nuus 13:00

BULLETIN NUUSAGENTSKAP 11 Desember 1 nm

Goeiemiddag. Ek is……..

In die bulletin:

# Minister Chikunga moedig Suid-Afrikaners aan om aan te sluit by die stryd om geslagsgeweld te beëindig
# Moskou maak besonderhede bekend oor Assad se ontsnapping na Rusland
# En, rugby: Ronan O’Gara stel nie belang om Wallis af te rig indien Gatland sou bedank nie

# Die minister in die Presidensie vir Vroue, die Jeug en Mense met Gestremdhede, Sindisiwe Chikunga, sê ‘n samewerkende benadering is nodig om geslagsgeweld te beëindig. Die Raad vir Geesteswetenskaplike Navorsing het die eerste nasionale Geslagsgeweld-oorsig vrygestel wat in 2022 gedoen is, en onthul het dat meer as 33-persent van Suid-Afrikaanse vroue in hulle leeftyd fisiese geweld ondervind het. Chikunga sê alle belanghebbers moet vasberade werk totdat die kettings van geweld verbreek is:

# Die Stad Johannesburg doen ‘n beroep op eienaars van spazawinkels om hul registrasievorms teen Vrydag in te dien. Die stad sê ondanks die vyf-duisend-944-vorms wat in sewe streke uitgereik is, is daar steeds min samewerking. Die vereiste dokumente sluit in gesertifiseerde ID’s, bewys van verblyf, geldige huurkontrakte en belasting-klaringsertifikate. Nie-nakoming kan lei tot winkelsluitings. Amptenare beklemtoon die registrasie is noodsaaklik om die sektor te reguleer en te ondersteun. Winkeleienaars word aangemoedig om stiptelik op te tree en permitte te bekom om ontwrigtings van hul ondernemings te vermy.

# ‘n Senior ekonoom van FNB, Thanda Sithole, sê die vervaardigingsektor bly onder druk weens swak plaaslike aanvraag en ‘n uitdagende globale omgewing. Vervaardiging het weliswaar in Oktober op ŉ jaargrondslag met 0,8-persent toegeneem en die daling van 0,8-persent in September omgekeer. Dit verbreek ook ŉ twee-maande-siklus van onindrukwekkende syfers. Sithole sê die swak prestasie is ondanks minder energiebeperkings en matige insetkoste:

# Rusland se adjunkminister van Buitelandse Sake het bevestig die voormalige Siriese leier, Basjar al-Assad, is in die land. Sergei Ryabkov het aan NBC News gesê hy is op die veiligste manier moontlik daarheen gebring. Hy het op ‘n vraag of Rusland Assad sal oorhandig vir verhoor, gesê hulle was nie betrokke by die konvensie wat die Internasionale Strafhof tot stand gebring het nie. Assad se regime word beskuldig van oorlogsmisdade, moord, stelselmatige marteling en gedwonge verdwynings. Sy vrou, Asma, en hulle twee kinders is glo ook in Moskou.

# Rugby: La Rochelle se afrigter, Ronan O’Gara, sê hy sal bitter graag op internasionale vlak wil afrig maar stel nie belang in Wallis nie, wat hulle laaste 12 wedstryde verloor het. Die voormalige Ierse losskakel het die Franse klub tot twee agtereenvolgende titels in die Kampioenebeker gevoer nadat hy hulpafrigter was by Racing 92 en die Crusaders. Volgens O’Gara is daar toetsafrigtingsposte wat hy baie graag sou wou hê, maar daar is geen moontlike vakatures nie. Die Walliese afrigter, Warren Gatland, het vroeër gesê hy gaan sy toekoms in Cardiff met sy familie bespreek.

# En die finansiële aanwysers: Die rand verhandel teen 17-rand-87-sent teen die dollar, 18-rand-77-sent teen die euro en 22-rand-78-sent teen die pond. Bitcoin verhandel teen 97-duisend-857-dollar. Die prys van goud is twee-duisend-691-dollar-45-sent per fynons en die prys van Brent-ruolie 72-dollar-55-sent per vat.

Bly ingeskakel vir meer nuus……………….