Nuus 13:00

BULLETIN NUUSAGENTSKAP 9 Desember 1 nm

Goeiemiddag. Ek is……..

In die bulletin:

# Wes-Kaapse skole is reeds vol vir 2025
# ‘n Onderwysaktivis is bekommerd oor onlangse geweldsvoorvalle teen onderwysers
# En, krieket: Die Proteas is nou boaan die Wêreldtoetskampioenskap na sy reeksoorwinning oor Sri Lanka

# Die Wes-Kaapse LUR vir Onderwys, David Maynier, sê hulle werk daaraan om elke leerder wat aansoek gedoen het, te plaas maar waarsku skole is vol. Die departement het teen verlede Woensdag meer as 117-duisend graad 1- en 8-leerders geplaas. Die departement beplan ook om ses nuwe skole te voltooi en 180 klaskamers by bestaande skole op te rig teen die tyd dat skole volgende maand begin. Maynier vra ouers wat nuwe aansoeke indien om geduldig te wees omdat hulle kinders moontlik eers teen die einde van die eerste kwartaal geplaas sal word.

Die onderwysaktivis Hendrick Makaneta is intussen uiters ontsteld oor twee gewelddadige voorvalle waarby onderwysers betrokke was. In KwaZulu-Natal is ‘n graad-drie onderwyser van die Mzangazi Primary School in Richardsbaai, Bonisiwe Maphumulo, in ‘n transitorooftog op pad werk toe doodgeskiet. In Gauteng is die waarnemende hoof van Northview High ses keer in sy kantoor geskiet en hy is in intensiewe sorg in die hospitaal. Makaneta sê die voorvalle het die onderwyssektor geruk:

# Die adjunkminister van Hoër Onderwys en Opleiding, Buti Manamela, vra studente wat vir befondsing by die Nasionale Finansiële Hulpskema vir Studente aansoek wil doen, dit voor die 15de Desember moet doen. Meer as 60-persent van aansoeke van nuwe studente wat volgende jaar wil studeer, is reeds toegeken. Manamela sê die sluitingsdatum vir aansoeke sal nie uitgestel word nie:

# Die voormalige minister van Finansies, Trevor Manuel, is aangestel in ‘n groep kundiges van die Verenigde Nasies met die taak om beleidsoplossings vir die wêreldwye skuldkrisis te vind. Die groep sal daadwerklike beleidsoplossings bevorder en politieke en openbare steun aanwakker om die skuldkrisis op te los. Die groep se bevindings sal tydens 2025 se Befondsing vir Ontwikkelings-konferensie gedeel word. Ontleders prys Manuel se kundigheid, maar kritiseer die Suid-Afrikaanse regering oor die onderbenutting van plaaslike talent, terwyl die land sy eie ekonomiese uitdagings ondervind.

# Krieket: Suid-Afrika het met 2-0 skoonskip gemaak in die toetsreeks teen Sri Lanka toe hulle die besoekers in Gqeberha met 109 lopies geklop het. Sri Lanka het hulle tweede beurt op die laaste oggend op 205 vir vyf hervat en moes ‘n wenteiken van 348 haal. Hulle laaste vyf paaltjies het egter kort na mekaar gekantel en al die kolwers was terug in die pawiljoen vir 238. Draaibouler Keshav Maharaj het vyf paaltjies geneem. Die Proteas is danksy hierdie oorwinning nou boaan die punteleer van die Wêreldtoetskampioenskap.

# En die finansiële aanwysers: Die rand verhandel teen 17-rand-87-sent teen die dollar, 18-rand-88-sent teen die euro en 22-rand-82-sent teen die pond. Bitcoin verhandel teen 98-duisend-998-dollar. Die prys van goud is twee-duisend-651-dollar-93-sent per fynons en die prys van Brent-ruolie 71-dollar-70-sent per vat.

Bly ingeskakel vir meer nuus……………….