Nuus 13:00

BULLETIN NUUSAGENTSKAP 2 Desember 1 nm

Goeiemiddag. Ek is……..

In die bulletin:

# Mazwanele Manyi van die MK-party verwerp die EFF se dreigement om op Nkandla beslag te lê 
# Die ANC gaan ‘n mosie indien oor Ramaphosa se salarisverhoging
# En, atletiek: Letsile Tebogo en Sifan Hassan word aangewys as wêreldatlete van die jaar

# ‘n Parlementslid van die MK-party, Mzwanele Manyi, het die EFF-leier Julius Malema se dreigement afgemaak oor regstappe om oudpresident Jacob Zuma se Nkandla-kompleks in beslag te neem oor onbetaalde regsfooie. Die geskil volg op spanning tussen die EFF en MK oor versekeie voormalige EFF-lede wat by MK aangesluit het. Manyi voer aan Zuma se eiendom is onder beskerming van die Ingonyama-trust en daar kan nie daarop beslag gelê word nie:

# Die ANC sal volgende week ‘n mosie by die Nasionale Vergadering indien vir ‘n debat oor president Cyril Ramaphosa se salarisaanpassing. Ramaphosa, wie se jaarlikse salaris bly op 4,2-miljoen-rand, het nie ‘n verhoging gekry vandat hy in 2018 die pos ingeneem het nie. Die adjunkhoofsweep van die ANC, Doris Dlakude, het die mosie bevestig, in ooreenstemming met aanbevelings van die Onafhanklike Kommissie vir die Besoldiging van Openbare Ampsbekleërs. Die Nasionale Vergadering sal ook ‘n salarisverhoging van 2,5-persent vir regters oorweeg.

# Die onderwysersvakbond Sadou se sekretaris-generaal, Mugwena Maluleke, het planne aangekondig vir versetoptrede om die instelling te eis van Artikels 4 en 5 van die BELA-wet. Maluleke veroordeel teenkanting daarteen en beskryf dit as verset teen verandering. Hy kritiseer ‘n onlangse ooreenkoms tussen Solidariteit en die minister van Basiese Onderwys, Siviwe Gwarube, en beweer dit bevorder rassisme en etniese verdelings. Maluleke doen ‘n beroep vir maatskaplike samewerking:

# Oproepe na die Nasionale Verbruikerskommissie sal drie maande lank gratis wees. Dit laat Suid-Afrikaners toe om vervalste kos of eetgoed wat verval het gratis aan te meld te midde van toenemende kommer oor besmette kos wat verbind word met kindersterftes. Die kommissie sê dit volg op president Cyril Ramaphosa se wekroep oor voedselveiligheid, en moedig verbruikers aan om verdagte verkope aan te meld en behoorlike kosetikette en gehaltestandaarde te verseker.

# Atletiek: Die Olimpiese kampioene Letsile Tebogo van Botswana en Sifan Hassan van Nederland is op die Wêreldatletiektoekennings in Monaco aangewys as die mans- en die vroue-atleet van die jaar. Die 21-jarige Tebogo het Botswana se eerste Olimpiese kampioen geword toe hy die 200-meter in Parys gewen het. Hy het ook die toekenning vir mans-baanatleet van die jaar ingepalm. Mondo Duplantis van Swede, wat sy eie wêreldrekord verbeter het met sy gouemedalje in die paalspring, is aangewys as mans-veldatleet van die jaar.

# En die finansiële aanwysers: Die rand verhandel teen 18-rand-9-sent teen die dollar, 19-rand-2-sent teen die euro en 22-rand-97-sent teen die pond. Bitcoin verhandel teen 95-duisend-364-dollar. Die prys van goud is twee-duisend-634-dollar-34-sent per fynons en die prys van Brent-ruolie 72-dollar-33-sent per vat.

Bly ingeskakel vir meer nuus……………….