Nuus 13:00
BULLETIN 30 November 1 nm
Goeiemiddag. Ek is……..
In die bulletin:
# Minister Gwarube verduidelik die NEDLAC-skikking oor die BELA-wetgeskil
# Eienaars van damme het sestig dae om dit te registreer
# En rugby: Die Blitsbokke skop goed af in die Dubai Sewes
# Die minister van Basiese Onderwys Siviwe Gwarube het die oplossing van ‘n NEDLAC-geskil verduidelik wat Solidariteit oor Artikels 4 en 5 van die Bela-wet aangevoer het. Die multilaterale skikking, onderteken deur die minister, die Presidensie en Solidariteit, het laasgenoemde se versetpoging afgeweer. Gwarube beklemtoon die verskil tussen NEDLAC se regsgeskilproses en voortgesette samesprekings. Die minister bevestig ook haar verbintenis tot dialoog vir konflikbeslegting. Sy sê die skikking beteken vordering met die hantering van kwessies wat in die arbeids- en onderwyssektore geopper is.
# Die Departement van Water en Sanitasie het die eienaars van damme versoek om binne 60 dae hul damme te registreer om die nakoming van veiligheidsregulasies te verseker. Dit volg nadat minister Pemmy Majodina ‘n kennisgewing uitgereik het waarin registrasie vereis word vir damme met ‘n veiligheidsrisiko. Die departement se woordvoerder, Wisane Mavasa, sê eienaars moet vorms indien om boetes te vermy en damveiligheid te verseker, aangesien dit openbare gesondheid en die omgewing sal beskerm:
# Die Wêreldvoedselprogram het die eerste besendings kos afgelewer by die Zamzam-vlugtelingkamp in die Darfoerstreek van Soedan. Die woordvoerder Leni Kinzli het aan Newzroom Afrika gesê 17-duisend-500-ton voedsel word afgelewer by 14 kritieke brandpunte in die hongersnoodgeteisterde Soedan. Sy sê ongeveer 4,7-miljoen kinders onder vyf, asook vroue wat borsvoed en swanger is, gaan gebuk onder aktute wanvoeding:
# Rugby: Die Blitsbokke het vanoggend vuurwarm afgeskop toe hulle Australië 17-0 geklop het in hulle eerste wedstryd van die Dubai-toernooi. Quewin Nortjé het die Bokke se eerste punte aangeteken met ‘n drie in die eerste helfte, terwyl Tristan Leyds twee keer oorgeduik het – eers in die eerste helfte en toe in die tweede. Hy het ook een van sy drieë verdoel. Die rustydtelling was 10-0. Die Suid-Afrikaners kom vanmiddag te staan teen Kenia, en vanaand teen die Franse in Groep A van die kompetisie.
# En ‘n minderjarige onwettige mynwerker wat Donderdagoggend, saam met ander jeugdiges, uit die nommer tienskag in Stilfontein gekom het, het goud wat in ‘n wit doek toegedraai was in sy onderbroek gehad. Die polisiewoordvoerder Athlenda Mathe sê die ontdekking is tydens die ondervragingsproses gemaak. Sy het bevestig dat goud met ‘n beraamde waarde van 80-duiusend-rand om die tiener se privaat dele gevind is. Hy het omstreeks 11-uur Donderdagoggend uitgekom, saam met ‘n 16-jarige van Zimbabwe en ‘n 19-jarige van Mosambiek.
Bly ingeskakel vir meer nuus……………….