Nuus 13:00

BULLETIN NUUSAGENTSKAP 27 November 1 nm

Goeiemiddag. Ek is……..

In die bulletin:

# Die minister van Elektrisiteit bevestig 1,7-miljoen kliënte het die sperdatum van voorafbetaalde meters misgeloop
# 1,6-miljard-rand is bestee aan die instel van die tweepot-pensioenstelsel
# En krieket: Die IKR ontmoet hierdie week oor die Kampioenetrofee-toernooi nadat Indië weier om in Pakistan te speel

# Die minister van Elektrisiteit en Energie, Kgosientsho Ramokgopa, het onthul 1,7-miljoen kliënte het nie teen Sondag se sperdatum hul voorafbetaalde meters opgradeer nie. Hy het aan die Parlement se portefeuljekomitee oor Elektrisiteit en Energie gesê dit veroorsaak die gevaar dat Eskom maandeliks twee-miljard-rand aan inkomste kan verloor. Ramokgopa beklemtoon die opgraderings is daarop gemik om die diefstal van elektrisiteit te bekamp. Hy sê pogings is aan die gang om die betrokke kliënte weer aan boord te kry:

# Die Gedragsowerheid vir die Finansiële Sektor het aan die Parlement se portefeuljekomitee oor Finansies onthul 1,6-miljard-rand is bestee om die tweepot-aftreestelsel in werking te stel. Die komitee is ingelig hierdie kostes dek veranderings aan die stelsel, opleiding van personeel, openbare opvoeding en die aanstel van bykomende personeel. Adjunkkommissaris Astrid Ludin beklemtoon hierdie uitgawes was noodsaaklik om te verseker die stelsel verloop glad:

# Die menseregte-organisasie sonder winsbejag, #Africa4Palestine, sê hy veroordeel die voortgesette laster en ongegronde bewerings teen Gift of the Givers se stigter, Imtiaz Sooliman. ‘n Joodse menseregte-prokureur het in ʼn ope brief gesê Gift of the Givers skenk geld aan groepe wat die Amerikaanse regering as terroriste-organisasies op ʼn swartlys geplaas het. Sooliman ontken die bewerings. #Africa4Palestine sê die beskuldigings is bloot ʼn smeerveldtog om Sooliman in onguns te bring vir sy wêreldwye humanitêre werk en steun aan Palestynse regte.

# Die Britse kleinhandelreus Frasers Group het sy verkryging van Holdsport, die eienaar van Sportsmans en Outdoor Warehouse aangekondig, hangende regulatoriese goedkeurings. Die transaksie versterk Frasers se wêreldwye voetspoor en sluit Holdsport se 88 winkels in Suid-Afrika en Namibië in. Die uitvoerende hoof, Michael Murray, het planne uitgelig om Holdsport se plaaslike kundigheid te verbind met Frasers se skaal. Dit volg ná Frasers se onlangse uitbreiding na Europa en Noord-Afrika, ‘n versterking van sy strategie om in die groeiende aanvraag na hoëgehalte-sportgoedere wêreldwyd te voorsien.

# Krieket: Die Internasionale Krieketraad vergader dié week oor die toekoms van die Kampioenetrofee-toernooi nadat Indië geweier het om in die gasheerland, Pakistan, te speel. Die IKR het die Pakistanse Krieketraad vroeër die maand ingelig dat Indië nie na Pakistan sal reis vir die toernooi van agt spanne nie, wat dit in die gedrang bring. Die Pakistanse Krieketraad het reeds voorstelle verwerp wat Indië sal toelaat om in ʼn neutrale land te speel en dring daarop aan dat die volledige toernooi in hulle land gespeel word.

# En die finansiële aanwysers: Die rand verhandel teen 18-rand-11-sent teen die dollar, 19-rand-4-sent teen die euro en 22-rand-80-sent teen die pond. Bitcoin verhandel teen 93-duisend-193-dollar. Die prys van goud is twee-duisend-649-dollar-55-sent per fynons en die prys van Brent-ruolie 72-dollar-29-sent per vat.

Bly ingeskakel vir meer nuus……………….