Nuus 13:00

BULLETIN NUUSAGENTSKAP 22 November 1 nm

Goeiemiddag. Ek is……..

In die bulletin:

# Kaapstad bied ‘n beloning van 100-duisend-rand aan na die moord op ‘n tiener in Elsiesrivier 
# Hongarye se premier sê hy gaan Netanyahu nooi vir ‘n besoek in weerwil van die Internasionale Strafhof se lasbrief vir sy inhegtenisneming
# En, gholf: Die Australiese PGA-kampioenskap word tot 54 putjies verkort weens reën

# Die Stad Kaapstad bied ‘n beloning van tot 100-duisend-rand aan vir inligting wat sal lei tot die inhegtenisneming en vervolging van diegene wat verantwoordelik was vir die moord op ʼn 14-jarige seun in Elsiesrivier. Grantham van Reenen is noodlottig gewond toe vermeende bendelede losgebrand het toe hy en twee vriende op pad was skool toe. Die burgemeesterskomiteelid vir Veiligheid en Sekerheid, JP Smith, sê Grantham was nie betrokke by bendes nie:

# Vodacom se regsverteenwoordiger, Wim Trengove, het in die Konstitusionele Hof gesê slegs die uitvoerende hoof van die onderneming, Shameel Joosub, kan billike vergoeding bepaal vir die skepper van Please Call Me, Nkosana Makate. Dit volg op ‘n bevel van die Appèlhof dat Vodacom sedert 2001 5- tot 7,5-persent van die diens se inkomste aan Makate verskuldig is, met ramings wat wissel tussen nege- en 63-miljard-rand. Vodacom se appèl verwys na prosedurele foute en die moontlike finansiële uitwerking op sy bedrywighede en sy belanghebbendes.

# Die GOOD-party verwelkom die Internasionale Strafhof se lasbriewe vir die inhegtenisneming van die Israelse eerste minister, Benjamin Netanyahu, die voormalige minister van Verdediging, Yoav Gallant, en Hamas se militêre leier, Mohammed Deif. Die hof sê daar is redelike gronde om te glo die drie mans is verantwoordelik vir misdade tydens die oorlog tussen Israel en Hamas. GOOD se sekretaris-generaal, Brett Herron, sê die lasbriewe daag kwytskelding uit en beklemtoon die rol wat wapenverskaffers soos die VSA en Duitsland speel:

Die Hongaarse premier, Viktor Orban, wie se land die roterende presidentskap van die Europese Unie beklee, sê intussen hy sal Netanyahu vir ʼn besoek nooi en die lasbrief ignoreer. Orban bestempel die hof se beslissing as ongelooflik astrant en sinies. Hy sê hy bemoei hom met ʼn langdurige konflik, weggesteek agter ʼn regsbesluit maar in werklikheid geneem met politieke motiewe.

# Gholf: Die Australiese PGA-kampioenskap is tot 54 putjies verkort nadat swaar reën oor Brisbane die organiseerders genoodsaak het om die tweede ronde op die Royal Queensland-klub af te las. Die plaaslike speler Elvis Smylie loop voor ná ‘n openingsronde van 65. Victor Perez van Frankryk en die Switser Joel Girrbach is gesamentlik een hou agter hom in die tweede plek, met die Suid-Afrikaner Aldrich Potgieter in ‘n groep spelers twee houe agter die voorloper. Die toernooidirekteur, José Maria Zamora, sê die toernooi sal Sondag afgehandel word.

# En die finansiële aanwysers: Die rand verhandel teen 18-rand-10-sent teen die dollar, 18-rand-78-sent teen die euro en 22-rand-66-sent teen die pond. Bitcoin verhandel teen 98-duisend-724-dollar. Die prys van goud is twee-duisend-694-dollar-98-sent per fynons en die prys van Brent-ruolie 73-dollar-75-sent per vat.

Bly ingeskakel vir meer nuus……………….