Nuus 13:00

BULLETIN 12 November 1 nm

Goeiemiddag. Ek is……..

In die bulletin:

# EFF-studente bevelstruktuur is geskok oor geslagsgeweldvoorval by CPUT
# Tennis:  Ondersteuners stroom na Turyn vir die laaste ATP-toernooi van die seisoen
# En, die Stad Kaapstad doen ‘n beroep op inwoners en besoekers om Kaapstad se natuurlewe aan die kus te respekteer

# Die EFF se studente bevelstruktuur is onthuts en geskok oor die geslagsgeweldvoorval by die Kaapse Skiereiland-universiteit vir Tegnologie. ‘n Mansstudent, wat glo by die Universiteit van die Wes-Kaap geregistreer is, is op sosiale media gesien waar hy ‘n vrouestudent herhaaldelik met ‘n mes steek. Sihle Lonzi van die EFF-studente bevelstruktuur sê Suid-Afrika is steeds ‘n misdaadtoneel, veral vir swart vroue en kinders. Hy sê hoër onderwysinstellings moet veilige hawens vir die toekomstige intelligentsia van die nasie wees.

# Die leier van Build One South Africa, Mmusi Maimane, doen ‘n beroep op alle Suid-Afrikaners om hulle leiers te benoem of om hulleself as kandidate vir die 2024 verkiesings beskikbaar te stel. BOSA het sy eerste vyf kandidate in KwaZulu-Natal bekendgestel wat in die verkiesing gaan staan. Maimane sê die party het 227 dae gelede sy kandidaatwerwingsmodel geopen om die beste 400 kandidate te identifiseer om die setels in die Parlement te vul.  Die doel van die omvattende werwingsproses is om te verseker elke kandidaat is behoorlik gekeur en dat slegs geskikte kandidate op die stembrief verskyn.

# Die polisiekommissaris van Noordwes, Sello Kwena, het die arrestasie van vyf verdagtes in verband met ‘n aanval op beamptes in Freedom-park naby Phokeng buite Rustenburg verwelkom. Twee speurders van die kantoor was besig met ‘n ondersoek in  Freedom-park toe hulle op ‘n 51-jarige verdagte afgekom het wat vir aanranding gesoek is. ‘n Polisewoordvoerder,  Sabata Mokgwabone, sê die beamptes is aangeval toe hulle probeer het om die verdagte na die polisiekantoor te neem:

# Tennis: Kaartjies vir die laaste 2023-ATP-toernooi aan die einde van die seisoen in die Italiaanse stad Turyn is uitverkoop. Dit is die derde agtereenvolgende keer wat die stad die hoogtepunt van die seisoen aanbied. In vanmiddag se openingswedstryd speel die 24-malige Grand Slam-kampioen, Novak Djokovic, teen die 20-jarige Holger Rune van Denemarke. Djokovic sal ook teen Jannik Sinner en Stefanos Tsitispas in die groepwedstryde te staan kom. In die ander groep pak die wêreld se nommer-twee, Carlos Alcaraz, vir Daniil Medvedev, Andrey Rublev en Alexander Zverev.

# En ten slotte: Die Stad Kaapstad herinner die publiek om die natuurlewe aan die kus te respekteer en enige interaksie so ver moontlik te vermy. Die versoek volg na ‘n voorval aan die Valsbaaise kus waar swemmers ‘n noorkapperwalvis en haar kalf genader het. Die burgemeesterskomiteelid vir Ruimtelike Beplanning en die Omgewing, Eddie Andrews, sê die natuurlewe is wild en moet te alle tye van ‘n respekvolle afstand af waardeer word:

Bly ingeskakel vir meer nuus……………….