Nuus 13:00

BULLETIN 3 Desember 1 nm

Goeiemiddag. Ek is……..

In die bulletin:

# President Ramaphosa is in sy skik oor mylpale wat bereik is by Cop28 in Dubai
# Gholf: Ashleigh Buhai van Suid-Afrika verdedig haar Australiese Ope-titel suksesvol
# En, die Shosholoza Meyl-treindiens tussen Johannesburg, Durban en Kaapstad is weer op dreef 

# President Cyril Ramaphosa het sy amptelike besoek aan Dubai suksesvol afgesluit, waar hy die COP28-spitsberaad bygewoon het. Ramaphosa het sy tevredenheid uitgespreek met die ontmoetings en het die aktivering van die 5.1-miljard-rand verlies- en skadefonds onderstreep as ‘n besondere prestasie. Hy doen ook ‘n beroep op meer lande om hulle aan te sluit by die pogings om die uitwerking van klimaatsverandering in ontwikkelende lande teen te werk. Daarby het Ramaphosa Suid-Afrika se Instellingsprogram van die Regverdige Energie-oorskakeling-beleggingsplan aan die sekretaris-generaal van die Verenigde Nasies, Antonio Guterres, voorgelê.

Vroeër het meer as 20 lande gevra vir die verdriedubbeling van die wêreld se kernenergiekapasiteit as deel van pogings om netto-nul-emissies teen 2050 te bereik. Die verklaring by COP28 het kernenergie se deurslaggewende rol in die bereiking van koolstofneutraliteit beklemtoon. Die Amerikaanse presidensiële klimaat-gesant, John Kerry, het kennis geneem van die omstredenheid rondom kernenergie weens kommer oor die veiligheid van die verwydering van kernafval. Die VSA, Ghana, Japan, Brittanje, Bulgarye, Kanada, Finland, Frankryk, Hongarye, Suid-Korea, Moldawië, Mongolië, Marokko, Roemenië, Slowakye, Slowenië, Swede en Oekraïne steun almal die inisiatief.

# Die leier van ActionSA, Herman Mashaba, het die party se 2024-verkiesingsveldtog by die Ga-Ramotse-sokkerstadion in Hammanskraal, Pretoria, van stapel gestuur. ActionSA beveg sy eerste nasionale verkiesing en fokus op die privaatsektor se betrokkenheid by ekonomiese ontwikkeling. Mashaba het ondersteuners toegespreek en hulle sterk standpunt teen misdaad en vir die herstel van reg en geregtigheid beklemtoon. Hy vra meedoënlose maatreëls teen misdadigers, verkragters en dwelmsindikate. Mashaba sê die party sal sleutelkwessies pak om ‘n veiliger en ekonomies-lewenskragtige Suid-Afrika te bou:

# Gholf: Ashleigh Buhai van Suid-Afrika het haar senuwees onder bedwang gehou en met een hou geseëvier oor haar mede-majorwenner Minjee Lee. Sy het sodoende haar vroue-Australiese Ope-titel suksesvol verdedig. Die 35-jarige speler het ‘n drie-oor-syfer 75 aangeteken en die toernooi afgesluit op nege-onder, een hou voor Lee, wie se 69 ‘n spannende einde verseker het. Die Chileense speler Joaquin Niemann het ook kalm gebly en sy eerste mans-Australiese Open op die tweede uitspeelputjie gewen.

# En, om mee af te sluit:  Die Shosholoza Meyl-trein het sy dienste vir die feestyd hervat en bied ritte aan van Johannesburg na Durban én na Kaapstad vir minder as ‘n duisend-rand. Die woordvoerder van Prasa,  Andiswa Makanda het bevestig die Hooflyn-passasiersdiensafdeling het sy diens hervat ná ‘n onderbreking van twee jaar, weens bedryf- en netwerkinfrastuktuur-uitdagings. Daarby sê Makanda sal Shosholoza Meyl ‘n bekostigbare privaatvoertuig-vervoerdiens teen ‘n bykomende bedrag aanbied vir passasiers wat na Durban reis. Dit sal diegene wat hulle voertuie ook wil vervoer in staat stel om dit te doen:

Bly ingeskakel vir meer nuus……………….